Sidinga incazelo odabeni lukamama
MHLELI: Ngicela ukudlulisa ukungenami kwami kuNgqongqoshe wezeMpilo KwaZulu-Natal uDkt Sibongiseni Dhlomo (osesithombeni).
Umama ungeniswe esibhedlela eNgwelezane ngo-Ephreli kulo nyaka ngenxa yenkinga ebisesinyeni. Walaliswa bamhlola wahlala cishe isonto elilodwa. Kuthe engakalulami kahle udokotela, esinalo igama lakhe, wamkhipha ngoba odokotela ayeqondene nabo bengekho.
Ubuyele ekhaya kwathi kuJulayi waphinda wagula wabuyela eNgwelezane walaliswa inyanga yonke enakwe ngobunono osonhlalakahle nodokotela ababili esinawo amagama abo. Uye eNkosi Albert naseStanger esaphethwe kahle njalo. Uthe ebuya eStanger waqala ukungabi nawo amandla okuzihambela ngezinyawo kahle. Osonhlalakahle nodokotela basazisa ngalesi simo bambeka embhedeni. Konke bese ekwenzela embhedeni. Saya komunye udokotela siyobuza ukuthi kahle hle kuqhubekani futhi yini le esiyenza ukuthi angalulami esezandleni zabo? Wasiphendula kahle wathi asimnike amasonto amabili usalindele imiphumela yegazi abayithumele eNkosi Albert kuzothi uma ibuya ayibheke bese eqhathanisa isimo sakhe efika esibhedlela nangenkathi elele khona eNgwelezane.
Savuka ngakusaaa sithi siyombona udokotela kwathiwa uxinwe wukugula akekho emsebenzini. Kwaqhamuka udokotela owakhipha umama ngo-Ephreli wakhuluma nomphathi wewodi isikhathi eside ekhuluma esibuka.
Emva kwakho kufike usonhlalakahle kithina ezosazisa ukuthi umama uyakhishwa ukhishwa ngudokotela ongasebenzi ngisho ewodini futhi obeqondene nokubheka umama ukuthi unomdlavuza webele yini noma cha lokhu akungenele kwesinye kube kuqhubeka kwenzeka.
Umkhipha nje akakwazi nokunyathela ulele phansi amasonto amabili wonke. Umama wafika ezihambela ngezinyawo. Kahle hle umkhipha kanjani umuntu ongakwazi nakuhamba umyise emndenini wakhe? Simyise esibhedlela ezihambela uma esekhishwa akasazihambeli? Kanjani? Uma sesiyombuza lo dokotela wathi akabhekene newodi kamama yena unikwe ifayela ngayizolo. Pho ubani omnike igunya lokumkhipha? Yini singatshelangwa ukuthi isibhedlela siyehluleka ukumsiza kunokuthi siphathwe kabuhlungu kanjena?
Bamkhipha bangabuza lutho, sengathi babethi thathani umthwalo wenu.
Ibe buhlungu into eyenziwe yilo dokotela ngoba futhi useyenza okwesibili. Uma sithatha ifayela siyobuza komunye udokotela uthe akaqondi ukuthi umkhiphe kanjani nesizathu sokumkhipha asizwakali naye akukho angakwenza ngoba ungaphezu kwakhe futhi obaphethe akekho.
Baba Dinangwe ngicela ukwazi ukuthi ukhishwa kanjani umuntu ongene ezihambela akhishwe engakabuyeli esimeni? Bona bamkhipha ngisho isihlalo esinamasondo singenaso singenalo nolwazi lokuthi umuntu osesimeni esinjena umsiza kanjani. Asiceli ukuthi abuyele esibhedlela sesithandazela ukuthi alulamele ekhaya. Kodwa sidinga incazelo Dinangwe.