Indodakazi kaSosobala idinwe okuthiwa ukhohlisa abantu ngegama likayise
ITHUKUTHELE yagana unwabu yakhethelwa zintulo indodakazi yenyanga eyaduma umhlaba wonke yaseNquthu ngenxa yenyanga esolwa ngokudla izicubu zabantu okuthiwa ilutha abantu isebenzisa igama likayise.
UNksz Makhosi Mbatha, oyindodakazi kaDkt Sosobala Mbatha owaba ngumuntu wokuqala omnyama ukuthenga ibhanoyi nowashona eminyakeni ewu-16 edlule, ithe ihlela ukumthathela izinyathelo zomthetho uMnuz Nino Mbatha ozibiza ngenyanga eyindodana kaDkt Mbatha, ovele enkantolo yemantshi eMtshezi ngoMsombuluko.
UMbatha uboshwe ngemuva kokuzinikela esiteshini samaphoyisa akule ndawo ngesonto eledlule ephethe izitho zomzimba womuntu ethi usekhathele ukudla abantu.
“Lo muntu uhudulela phansi igama likababa. Akekho umuntu oyindodana kababa IKHASI ELIKHOKHELWE okhona engimaziyo. Indodana yakhe okwakungukuphela kwayo yashona kudala ubaba esaphila. Naye waze washo etshela abezindaba ukuthi bekungukuphela kwendodana abenayo,” kusho uNksz Mbatha.
Uthe kuze kube manje akekho osethathe izikhwama zikayise, zisabekiwe.
“Singishaqise kakhulu isenzo salesi sigilamkhuba ngesikhathi ngifunda ephephandabeni ukuthi uzibiza ngendodana kababa. Ubaba wayengabanqumi abantu kodwa ubesiza umphakathi, elapha. Ngisazoxhumana nommeli wami ukuze sibone ukuthi yiziphi izinyanthelo zomthetho engingazithatha ngoba le nto ayenzayo egameni likababa yimbi futhi ayemukelikile. Kumele bonke abantu ake abalutha baphumele obala ukuze ajeze.”
UDkt Mbatha ushone ngoSepthemba 2000, ngemuva kwesikhashana ebuya emazweni aphesheya ukuyocobelelana ngolwazi ngezindlela zokulapha.