Isifo sikaSiphesihle sivamile komama
IXAKE abaningi indlela aziphethe ngayo muva nje uSiphesihle (Pearl Monana) weGenerations: The Legacy edlala ku-SABC 1. USphesihle oshade noMazwi Moroka (Musa Ngema) usanda kuba nengane angafuni lutho oluzosondela eduze kwayo. Umndeni wakhe usugcina umnqabela ukuthi ayibone ngenxa yendlela ayithanda ngayo ingane engazalwa uMazwi kodwa ezalwa ngumfowabo uSmanga (Moopi Mothibeli). Ukhwantalala lumi ngenhla kuyena kanti sebeze bamfunela nosizo oluyisipesheli ukuxazulula inkinga yakhe. Phezu kokuthi uSphesihle eshaywa wunembeza wokuthi umyeni wakhe akazi ukuthi ingane akuyona eyakhe, “isifo” esimphethe sijwayelekile kwabesifazane abaningi uma besanda kubeletha .
Yize lokhu okwenzeka kwiGenerations kuwumdlalo, ongoti bathi kuyenzeka owesifazane osanda kubeletha abanjwe wukhwantalala. Bathi ukuba nengane, ikakhulukazi kwabaqalayo kuza nezinguquko eziningi empilweni. Lezi zinguquko zihambisana nokuba nomsebenzi onzima wokunakekela ingane, kwesinye isikhathi okudinga nemali. Lesi sifo sibizwa ngePostpartum Depression (PPD) noma iPerinatal Mood Disorder. Ngokombiko we-website yeBaby Center kuvela ukuthi bawu-20% abesifazane abaphathwa yiPPD uma besanda kubeletha kanti bawu-80% abasuke beqala ukuzala. Kuthiwa lesi sifo sijwayele ukuphatha omama kusukela bezele kuya ezinyangeni ezine. Nokho uma singasukunyelwa singagcina sithatha isikhathi eside kunalokhu. Kukhuthazwa ukuthi umama azinike isikhathi sokulala ngokwanele nokuphumula uma kuvela ithuba. Ukuzivocavoca nokudla ngendlela efanele kungaphumuza umqondo, kunciphise nokhwantalala. Nazi izimpawu zalesi sifo:
Ukungalali nokungaphumuli ngoba ucabanga ingane.
Umqondo wakho awuphumuli, unovalo uma ucabanga ngengane.
Wenza okungale kokujwayelekile ukunaka ingane nokudlala indawo yokuba ngumzali.
Kunzima ukushiya ingane yakho yodwa ekamelweni noma ukuyishiya nothize ngisho imizuzwana embalwa.
Uyazisola ukuthi awuyena umama oqotho, uzizwa unentukuthelo nokulahlwa unembeza.
Uhlala usaba sengathi kukhona okubi okuzokwehlela ingane.
Ucasuka kalula, kwesinye isikhathi noyise wengane umbona engenzi okwanele ukukweseka.
Awusenaso isikhathi sakho.