‘Awazethembi amadoda ahlukumezayo’
Uthi amadoda angazethembi iwona athanda ukusebenzisa udlame.
“Awazethembi amadoda ahlukumezayo. La madoda asuke engenakho ukuzethemba bese ebona ukuthi ukuhlukumeza umuntu ongenawo amandla okuziphindiselela ukuze azizwe eyindoda yikhona okulungile,” kuchaza uDkt Myeni.
Ukulahlwa ngabazali nakho ukubale njengomunye umthelela.
“Uma ingane yomfana ilahlwa ngunina mhlambe ayoshada komunye umuzi, angabe esayinaka, mhlazane waba nobudlelwane nomuntu wesifazane, uyokhipha yonke inzondo yakhe kulona wesimame ngoba ethi uzwisa unina ubuhlungu,” kuchaza uDkt Myeni othi lo wesilisa usuke engaboni nakancane ukuthi useyahlukumeza.
Ngakolunye uhlangothi, uthi nokungabi khona kukababa empilweni yomfana kungaba nomthelela ongemuhle.
NgokukaMyeni, kubalulekile ukukhulisa ingane yomfana ngesinono ukuze ibe yindoda eqotho nengahlukumezi.
Uthe umndeni onenhlamba noma ubaba ohlale ethuka, wenza umfana akhule ecabanga ukuthi ukuthuka owesifazane iyona yinto elungile uma ukhuluma nowesifazane.
Nokukhuluma noma kanjani naye, umbize ngamagama amabi kunomthelela omubi.
“Ukubiza umfana ngesidididi esiyokhula singabi lutho empilweni kubi.
“Nhlanhla leyo aphumelele kungabi njengoba bewusho. Uzoqala lapho ahambele phezulu futhi yonke into uzoyithatha ngendluzula ngoba yena uzibona engcono kunawe.
“Usezohlukumeza abesifazane ngoba efuna ukutshengisa ukuthi akukho lutho oluyoke lume endleleni yakhe ukuze athole izinto azifunayo,” kuchaza uDkt Myeni.
Uqhube ngokuthi laba abazibulalayo basuke bezithukuthelele bona futhi sebebona ukuthi ayisekho into abayiphilelayo.
“Abazisebenzisi izindlela ezithatha kancane zokuzibulala kodwa bafuna esheshayo ngoba basuke bengasafuni ukuba nomuzwa wokuba isihluleki,” kusho udokotela.
“Laba ababulala ophathina bagcine ngabo ingoba usuke ekuthanda ngendlela edlulele futhi akafuni ukuthi uthandwe omunye umuntu ngaphandle kwakhe. Uzitshela ukuthi uma kungeke kube uyena othandana nawo shuthi kungcono akubulale mase elandela ngaye,” kusho uDkt Myeni.
Ushilo ukuthi umuntu azwana naye akakwazi ukumsiza uma owesilisa engafuni ukuzibophezela ekutheni udinga usizo. “Ayikho into engasiza abantu besifazane ukuthi bazivikele ngaphandle kukuphuma kulobo budlelwane meke waqala wamhlukumeza ngoba akusekho ukuthi uyoke ayeke.
Uma uzama ukumchazela ukuthi unenkinga futhi udinga usizo sekuyobe uzidonsela amanzi ngomsele ngoba uzosebenzisa udlame, yingakho kungcono umshiye ngaphambi ngokuthi kuze kufike esigabeni sokukuhlukumeza,” kuphetha uDkt Myeni.