Izobhekana ne-Ajax igcwele ukuzethemba iMaritzburg
UMDLALI wasemuva weMaritzburg United, uPogiso Sanoka, ukholwa wukuthi ukuvuleleka bengabadlali yikhona okuletha impumelelo kuleli qembu.
ITeam of Choice iqale isizini ka-2017/2018 ngegiya eliphezulu ikhipha iMamelodi Sundowns kwiMTN8, yaphinda yacosha amaphuzu amathathu ekuhambeni kwiPlatinum Stars ngempelasonto edlule iyihlula ngo 2-0. Iyaqala ukudlulela kumasemifinal eMTN8 kusukela yasungulwa.
Phezu kokuba iMaritzburg ingachithanga inqwaba yabadlali abebejwayele ukudlala kodwa isayinise abanye ngenhloso yokwenza kangcono kule sizini okukhona kubo uSiyanda Xulu obedlala kuKaizer Chiefs. Ngesizini edlule uSanoka ubemiswe kabi nguKwanda Mngonyama, osebuyele kwiSundowns, endaweni ayidlalayo.
“Ngesizini edlule bengingadlali njalo ngoba bengibanga indawo nabantu abanamava. Bekuthi noma ngithola ithuba kube nzima. Kule sizini sibambisene, siyakhuluma nabadlali esidlala nabo emuva uFransman (Bevan) no-Onyango (Brian). Banginika inkululeko yokudlala ngendlela engithanda ngayo, bangicebise ukuthi ngenze kanjani. Ngicabanga ukuthi lokho kubambisana yikhona okusisebenzelayo nokuthi isikimu asishintshile kunalesi ebesidlala ngesizini edlule,” kusho uSanoka.
“Kule sizini ngifuna ukudlala imidlalo eminingi, ngisize iqembu liqede kwenye i-Top 8 siphinde siwine okungenani indebe eyodwa. Ukuwina kwethu kwiSundowns kusifakele ukuzethemba kakhulu, sonke nomqeqeshi sijabule ngendlela esidlala ngayo.”
Abaphathi beMariztburg baqunge isibindi banikeza ngokugcwele isikhundla sokuqeqesha uFadlu Davids okuphele isizini edlule esephethe izintambo zokupheka leli qembu. Amaqhinga akhe azophinde avivinywe namuhla iMaritzburg seyamukela i-Ajax Cape Town eHarry Gwala Stadium,eMphithi, ngo-7.30 ebusuku.
“Ngeke sithathe izinto kancane sesibhekene ne-Ajax, sithatha yonke imidlalo njengeyamanqamu. Sifuna wonke amaqembu azodlala nathi eHarry Gwala athwale kanzima,” kusho uSanoka.
Umqeqeshi we-Ajax, uStanley Menzo uthe kufanele baqaphele uma sebebhekene neTeam of Choice. I-Urban Warriors idlale ngokulingana ngo 1-1 neLamontville Golden Arrows emdlalweni wokuqala wesizini.