Sivuma ingcindezi isilomo seChiefs
ISILOMO somdlali weKaizer Chiefs, uHendrick Ekstein, sivuma eyengcindezi esibhekene nayo njengomdlali oyisithandwa sabalandeli baMakhosi.
U-Ekstein (26) unyuselwe eqenjini elikhulu leChiefs ngesizini edlule. Abalandeli beZimpofana bayazifela ngalo mdlali kwazise ukhonze ukulihlikihla kodwa kuze kube yimanje akakafiki ezingeni ledumela lakhe.
Exoxa neSolezwe ukusho kwagcwala umlomo ukuthi uyayizwa ingcindezi eqhamuka kubalandeli futhi uzimisele ngokungabaphoxi.
“Ngiyajabula ukuthi abalandeli bayasithanda isitayela sami sokudlala. Yize ngijabula kodwa lokho akuyona yinto engiyifake ekhanda. Ingcindezi ngeke ngiphike ikhona kodwa indlela yokwehlisa ingcindezi wukuthi ngenze umsebenzi enkundleni.
“Ngizimisele ngokuqhubeka nokusebenza kanzima. Angizimisele ngokuphoxa abalandeli. Ngifuna ukufaka isandla empumelelweni yeqembu. Isimo ababhekene naso (abalandeli) ngisiqonda kahle.
“Ngikhule ngeseka iChiefs ngakho ngiyazi ukuthi abalandeli bazwela kanjani. Angibasoli ngokusidinelwa futhi indlela okumele sixolise ngayo kubona wukuthi siwine imidlalo nezicoco,” kusho u-Ekstein. Umqeqeshi waMakhosi uSteve “Mphathi” Komphela ubhekene nengcindezi eqenjini. Useqede amasizini amabili engawini lutho kuMakhosi. Kule sizini iChiefs ayikanqobi. Ikhishwe yiSuperSport United kwiMTN 8 kwathi kusenjalo yabambana neBloemfontein Celtic ngo 1-1 eFree State Stadium, ngeSonto.
“Imimoya iphansi njengoba izinto zingahambi kahle kodwa sizimisele ngokuvuka sizithathe. Kumele sibhukule, iChiefs ayifanelwe ukuba lapho ikhona njengamanje. Konke kulele kithina ukuthi sivikele umqeqeshi.
“Uma siqhubeka nokungayitholi imiphumela abalandeli ngeke bayeke ukuhlala umqeqeshi entanyeni. Sibheke ukuthola amaphuzu amathathu ethu okokuqala kule sizini ngoLwesithathu (namuhla) lapho sizobe sibhekene neSuperSport. Asibhekile ukukhokha isibhongo nje kuphela kodwa sifuna ukunqoba umdlalo,” kusho u-Ekstein.
Namuhla ngo-7.30 ebusuku iChiefs izobhekana neSuperSport eFNB Stadium, eSoweto, eGoli, emdlalweni we-Absa Premiership.
“Sizimisele ngokujika izinto. Siyazama ngayo yonke indlela ukushintsha izinto. Inhlanhla kulezi zinsuku iyasiphika. Sizoqhubeka kodwa nokuzama.
“Abalandeli ngicela basibekezelele, imiphumela bazoyithola maduze. KwiSuperSport wonke umuntu wabona ukuthi sakwenza konke kodwa ibhola lenqaba ukungena enethini,” kusho u-Ekstein.
Imidlalo ye-Absa Premiership:
Namuhla ngo-7.30 ebusuku: Golden Arrows v Bloemfontein Celtic (Princess Magogo Stadium); Cape Town City FC v Platinum Stars (Cape Town Stadium); Maritzburg United v Ajax Cape Town (Harry Gwala Stadium); Free State Stars v Bidvest Wits (Goble Park); Kaizer Chiefs v SuperSport United (FNB Stadium).