Abebengazwani koweNgqwele
KUZOQOPHEKA umlando emcimbini weNgqwele Kamaskandi kucula ngokuhlanganyela abaculi asebaziwa ngokuba yinkukhu nempaka.
Kulezi zinsuku abaculi baseWest bagadlana bodwa kodwa uKhangelani ‘DSD’ Mhlongo woSaziwayo uthi uzobahlanganisa khona kunjalo bacule ngokuhlanganyela enye ingoma yabo ethi Ayingangamlomo.
Kule ngoma kucula phambili uKhangelani, uKhuzani ‘Indlamlenze’ Mpungose, uDlubheke Khuzwayo waManguni Amahle neMfezemnyama. Kuzokhunjulwa ukuthi uDlubheke usanda kugadla kabuhlungu kuKhuzani ngengoma ethi Kwazondimbuka ekubeni noKhuzani esolwa ngokugadla kuKhangelani ngengoma ethi Inyoka Endlini.
Lezi zinsizwa uma zihlangene zizibiza ngeZikhondlakhondla futhi zike zacula ngokuhlanganyela engomeni ethi Qula Kwedini.
Ebuzwa ngalesi sinqumo uKhangelani uthe ufuna ukukhombisa umhlaba wonke ukuthi udlame alusadingeki emculweni ngoba ludlula nemiphefumulo yabalandeli. “Asisekho isidingo sokungcofana ngoba akwakhi kodwa kuxabanisa abalandeli. Njengoba sengibuya phesheya ngomculo, ngifuna ukuba yisibonelo esihle kubaculi abeza ngemuva kwethu. Abantu abazofika kulo mcimbi bazobhema bakholwe futhi sifuna babone ukuthi singangcofana ngezingoma kodwa siyezwana, asixabene. Kuningi okuhle esizobenzela kona ngalolu suku esingakaze sakwenza kweminye imicimbi,” kusho uKhangelani osebuya e-USA ngemuva kokuhlabana ngendondo yeBest Song of The Year kumaSatma Awards ngo2015. “Ngikhuluma nje ngiqalile estudiyo ngiqopha iCD yami entsha. Abantu bazozwa ukuthi mina angisayingeni ekamangcofana kodwa sengishaya ingoma eyakha isizwe ngoba yilokho okungakhele udumo.”
UKhuzani uthe noma kanjani bazoyicula le ngoma ngoba bayicula ngokuhlanganyela. “Abantu bazobona into engizobe ngiqala ngqa ukuyenza, engingakaze ngayenza kweminye imicimbi. Angizoyisho leyo nto kodwa abantu ngibafihlele induku emqubeni. Angifuni ukuyikhulumela eziko. Engingakusho nje wukuthi abalandeli bami bazobe bebaningi kakhulu kunabanye, kuzobe kukhona umbala o-blue nje,” kusho uKhuzani.
UKhangelani uzobe eshiyelana inkundla kwiNgqwele Kamaskandi Music Festival eWorkshop Centrum Park noMjikijelwa, Amageza Amahle, Igcokama Elisha, Khuzani, Imfezemnyama, Qhoshangokwenzakwakhe, Indodakazi Yentandane noBahubhe. Uthe ezingomeni azozicula ngalolu suku kukhona ethi Ngishaya Okusendleleni Yami, DSD International nethi Udumo Lwami. “Kulo nyaka angishayi muntu kodwa ngizobe ngibathunuka amanxeba nje kuphela ngengoma,” kuphetha uDSD. Kusasa ithimba leNgqwele lizobe liseWorkshop lapho lizobe liphisana ngezipho ezinhlobonhlobo kubantu asebewathengile amathikithi kumaComputicket ngoR80. Abaxhasi bomcimbi, oqala ngo-10 ekuseni uphele ngo-6 ntambama, yiMaz Herbal Products, Zululand FM, Papa Maize Meal, Coca Cola, uMnyango wezokuThutha, uMasipala weTheku, Shoprite, Umgeni Water, Halfway Malanda Toyota, Mbawula Investments neCyassound Holdings.