Akathi vu ‘omiswe’ kwi-Metro FM
UMSAKAZI wezinhlelo zezingxoxo kuMetro FM, uCriselda Dudumashe, uthi akukho azokuphawula ngokungazwakali kwakhe kuMetro FM.
Lo msakazi owenza iMetro FM Talk ngo7.30 ebusuku ngoLwesithathu nangoLwesine, akazwakalanga ohlelweni lwakhe ngoLwesithathu ebusuku.
“Angeke ngikwazi ukuphawula. Ngicela uxhumane noKaizer (Kganyago, okhulumela iSABC),” kusho uCriselda.
UKaizer uthe iSABC ikuzwile ukuphawula okuthiwa kwenziwe nguye kwezokuxhumana futhi iyaziqhelelanisa nakho.
“Ngenxa yalokhu ngeke aze afakwe emoyeni kuze kube lolu daba luyaxazululwa,” kusho uKaizer.
Uthe ngenxa yokuthi uyitoho “asilukhulumi lolo limi lokuthi umisiwe kodwa ngeke ahlelelwe ukuthi azwakale emoyeni”.
NgoLwesithathu ngaphambi kokuthi kuqale uhlelo uKganyago wenze isimemezelo esifanayo emoyeni. Uhlelo belubanjwe nguKgopedi Lelokwe.
Kube nokukhulu ukukhala ngoCriselda ezinkundleni zokuxhumana ngokuvikela kwakhe obeyiPhini likaNgqongqoshe weMfundo ePhakeme, uMduduzi Manana, osolwa ngokushaya abesifazane eCubana, eFourways.
Usolwa nangokucwasa abantu abazishintsha ubulili (transgender) ngesikhathi ekhuluma e-University of Venda muva nje.
Kuthiwa wacela abesilisa ukuthi basukume wathi uma nje besenezinduku, bangamadoda. Lo msakazi ubhale ezinkundleni zokuxhumana ukuthi uyakwemukela ukugxekwa futhi uyaxolisa.
Uthe ngenxa yalokhu uthathe isinqumo sokuthi akunqabe ukuphakanyiswa kwegama lakhe ukuthi abe sebhodini leSA National AIDS Trust (Sanat).
UKganyago uphinde wakuqinisekisa ukuthi ligqabukile igoda phakathi kweMetro FM nomsakazi walesi siteshi, uWilliam Lehong.
UWilliam ubengena ngoMgqibelo ngo-10 kuya ku-2 emini ohlelweni iMetro FM Top 40.
UKaizer uthe ubenezinkinga nesiteshi kwabe sekuthathwa isinqumo sokuthi inqanyulwe inkontileka yakhe.
“Akakatholakali ozovala isikhala sakhe. U-Adil nguyena ozoqhubeka. Usebambe cishe amasonto amane manje.”