Izinsongo kophunyuke ethunjwa
USETHOLA izinsongo zokubulawa umfundi kaGrade 10 waseStanger Secondary ophunyuke ogibeni kade esezothunjwa ayoqwayiziswa ngamadoda asolwa ngokunika abagilwa izidakamizwa.
Umfundi (15) kuthiwa kumanje akasalubhadi esikoleni ngemuva kokuphunyuka kubasolwa ngeledlule.
Umfundi, ongeke adululwe ukumvikela, kuthiwa amadoda amsabisa ngokuthi azombulala uma eke wawababika emaphoyiseni.
Ngokuthola kweSolezwe, umfundi ungowesibili ukuphunyuka kulolu gibe esikhathini esingaphansi kwezinyanga ezimbili. Izinsolo zokufunzwa kwabafundi izidakamizwa ngamadoda sekufake uvalo kubazali abasaba ukuthi izingane zabo zingase zintshontshwe.
Omunye umfundi othe usinde kula madoda kuthiwa ufunda eML Sultan High.
Kuthiwa amadoda ashushumbisela abafundi i-cocaine esikoleni bese kuthi ngezimpelasonto babenzele imicimbi.
Umfundi waseStanger Secondary kuthiwa wezwa amadoda ethi usekulungele ukuthi usengaqwayiza nokuyilapho ebone khona ukuthi kumele abaleke endlini ababekuyo.
Unina womfundi, naye ongeke aze adalulwe ukumvikela, uthe kumanje indodakazi yakhe isathukile futhi iyaqhaqhazela uma ixoxa le ndaba.
“Ingane ithi amadoda abebanika izidakamizwa aphinde abenzele nemicimbi endlini thizeni ngezimpelasonto,” kusho unina womfundi.
Uthe le nto eyenzekayo ikhombisa ukuthi izingane zabo aziphephile ezikoleni.
“Laba bantu kuthiwa bebefika esikoleni bazenze abazali baze bahlole ngisho umsebenzi wabafundi,” kusho unina womfundi.
Esinye sezikhulu zamaphoyisa oMkhandlu waKwaDukuza, uChief Superintendent Mabo Thengwayo, uthe baqale bezwa ngomkhuba ngemuva kokuduka kwengane yaseML Sultan.
“Umfundi waseML Sultan uke wanyamalala kwatholakala ukuthi ubehleli ndawana thize lapho kade engxinxwa khona ngezidakamizwa. Lowo mfundi kumanje uthola usizo esikhungweni sethu esihlumelelisa izimilo. Sisababaza indaba yakhe sibe sesizwa ngalo mfundi waseStanger Secondary yena okumanje akasalubhadi esikoleni ngoba esatshiswa amadoda,” kusho uThengwayo.
Uthe bathole ukuthi baningi abafundi baseStanger Secondary abaxhumene nala madoda. “Umfundi usitshele ukuthi akayedwa kodwa kukhona nabanye abafundi abasayihamba imicimbi yala madoda ayingozi.”
Uthe balindele ukuthi umfundi uma esesimeni esikahle abanikeze yonke iminingwane khona bezobopha amadoda.
UThengwayo uthe izikole eziningi zaseStanger aziphephile ngoba zinopotsho.
Izolo ithimba lamaphoyisa omkhandlu, i-Saps ne-K9, ligasele ezikoleni ezehlukene eStanger lafike lathola insangu kwabanye abafundi.