Abahlaziyi ngoluthinta abakwaGupta
ABAHLAZIYI bezepolitiki bathi noma umndeni wakwaGupta ungathutha ubuyele eNdiya kodwa amaqembu aphikisayo azothola okusha azovalela i-ANC ngakho ekhoneni.
UMnuz Protas Madlala, umhlaziyi, uthe nakuba lo mndeni usudayise inkampani yabezindaba neyezimayini kodwa mancane amathuba okuthi lo mndeni ungathutha ubuyele lapho udabuka khona.
UMadlala uthe uma kwenzeka uthutha lokho akusho ukuthi kuzobe sekuphelile ngokuhlushwa kweANC ngamaqembu aphikisayo. “Khona kungehla ukuhlale kukhulunywa ngabakwaGupta kodwa kukhona okusha okuzovela. Amaqembu azohlale njalo efuna okusha azokusho okuthinta i-ANC.”
Uthe vele umsebenzi wawo ukuthi aqinisekise ukuthi uhulumeni uyazihambisa izidingo kubantu.
UMnuz Thabani Khumalo yena uthe yize kungehla ukukhuluma ngalo mndeni kodwa naye akacabangi ukuthi uzolifulathela elakuleli. Uthe uthemba ukuthi umengameli usifundile isifundo ngokuthi asondeze lo mndeni. “Uma lo mndeni ugcina uhamba singavalwa isahluko sokukhuluma ngalo mndeni njengoba ubukeka udayisa zonke izinto kuleli. Ukuthi uzodayisa ngempela noma wenzela ukuthi uphinde ukwazi ukwenza ibhizinisi kuleli yinto esazovela. Kungenzeka futhi ukuthi wenza sengathi uyazidayisa lezi zinkampani kanti uzoqhubeka esithe uthole inzuzo ukuze usuke emehlweni omphakathi njengoba kusalindeleke ukuthi kwenziwe nophenyo ngokudliwa kwamandla ombuso yidlanzana.”
Uthe ne-ANC kudingeka ibuyisane ngalesi sikhathi njengoba ibheke engqungqutheleni yokukhetha ubuholi.
Inkampani yezindaba i-ANN7 nephephandaba iNew Age lithengwe yinkampani kaMnuz Mzwanele Manyi, oke wakhulumela uhulumeni wakuleli.
UManyi uke waba ngumengameli wenhlangano yosomabhizinisi abamnyama iBlack Management Forum.