Kumiswe abaholi abeseka uRamaphosa
SEKUPHINDE kwahlakazwa esinye isifunda se-ANC esisolwa ngokukhankasela iPhini likaMengameli wezwe, uMnuz Cyril Ramaphosa.
Isolezwe lithole ukuthi abaholi besifunda saseMsinga, esibhekele amagatsha aseMsinga, bamiswe yisifunda esikhulu saseMsinga ngaphandle kwencwadi echazela abaholi ngokuholele ekumisweni kwabo.
Abakhulume neSolezwe kodwa bangathanda ukudalulwa, bathe isifunda esincane (sub-region) besinomhlangano nesifunda esikhulu eMsinga ngoLwesithathu kwase kuvela ukuthi bayamiswa abaholi balesi sifunda. Bathe uma bebuza izizathu batshelwa ukuthi kabawenzi kahle umsebenzi.
USihlalo wesifunda esincane saseMsinga osamisiwe, uMnuz Zitha Zuma, ukuqinisekisile ukuthi bamiswe ngaphandle kwencwadi ebazisa ngokumiswa kwabo.
“Kuleli sonto besinomhlangano, usihlalo wesifunda saseMsinga wasitshela ukuthi uyalelwe wubuholi besifundazwe be-ANC ukuthi akasimise ngoba asiwaxhumanisi amabranch nesifunda esikhulu. Sibuza ukuthi ziphi izikhalo zamagatsha asho lokhu wathi uyasimisa ngokuphazima kweso futhi akukho azokuphendula,” kusho uZuma.
Ebuzwa ngezinsolo zokuthi bamiselwe ukweseka iPhini likaMengameli, uMnuz Cyril Ramaphosa ukuthi kube nguye ongena esikhundleni sikaMengameli Jacob Zuma ngo-2019, uZuma uthe abakaze bakhethe mholi abamesekayo ngoba i-ANC ibingakawukhiphi umyalelo wokuthi mabaqoke abantu.
“Sifuna ukwazi ukuthi kungani simiswe ngomlomo kuphela, sifuna ukuthola incwadi uma kuwukuthi ukumiswa kwethu kusemthethweni. Asikaze sithi siseka uRamaphosa thina,” kusho uZuma.
Imizamo yokuthola ukuphawula kusihlalo wesifunda saseMsinga, uMnuz Bheki Lembede, ayiphumelelanga. ubengaluphenduli ucingo lwakhe kusukela ngoLwesithathu kanti nemiyalezo athunyelelwe yona nge-sms ubengayiphenduli.
UMnuz Mdumiseni Ntuli okhulumela i-ANC KwaZulu-Natal, uthe akanayo imininingwane yalolu daba wacela ukuthi kuthintwe uLembede. Akazange aphawule noma esechazelwa ukuthi uLembede akayiphenduli imiyalezo athunyelelwa yona.