Imashi yabaqaphi baseziteshini zamaphoyisa
BAKHALA ngezimo zokusebenza ezingagculisi, onogada abasebenza eziteshini zamaphoyisa esifundazweni, abamashele emahhovisi akomkhulu lamaphoyisa aseThekwini, izolo.
Le mashi ibiholwa inyunyana iSapu. Onogada bathe abanelisekile ngezimo abasebenza ngaphansi kwazo okubalwa kuzo izindlu okuhlala kuzo onogada uma besebenza, amaholo nezinto zokuzivikela.
USihlalo weSapu esifundeni iDurban South, uMnuz Bongumusa Guma, uthe amanye amalungu abo asesebenze iminyaka engu-24 kuya phezulu kodwa awakakhushulelwa esigabeni esilandelayo samaholo.
“Kwa-SAPS ayisekho into ebizwa ngo-level 3, kodwa amalungu ethu asaholelwa ngokwaleso sigaba. Sikhala kakhulu nangezimo zokusebenza njengoba onogada benganikwa ngisho izimpahla ezivikela inhlamvu ukuthi ingangeni, nezibhamu kodwa besebenza ngaphansi kwezimo ezibucayi,” kusho uGuma.
Uthe onogada bajutshwa ukuthi bagade abantu abayingozi ezibhedlela, uma kukhona isigebengu esidutshuliwe sangeniswa esibhedlela okudingeka ukuthi siqashwe ngamaphoyisa baya kosigada, kodwa abanikwa izinto zokuzivikela.
Phakathi kohlu lwezikhalo ebezibhalwe encwadini ethulwe emahhovisi amakhulu amaphoyisa kulesi sifundazwe, bafuna ukuthi bakhokhelwe imali ye- Unemployment Insurance Fund (UIF) ababebanjelwa yona phakathi kuka-1994 no-2008.
Bafuna ukuthi bangaqashwa ngaphansi komthetho iPublic Service Act, babuyiselwe kwi-Police Service Act njengoba babeqashwe ngaphansi kwalo mthetho ngo-1994.
Baphinde bakhala nangendlela abaphathwa ngayo yiziphathimandla zamaphoyisa eziteshini ezehlukene nokuvele ukuthi abaphathwa ngendlela efanayo, abanye bayahlukunyezwa.
Bethula incwadi yezikhalo, bagcizelele ukuthi bafuna iziphathimandla emaphoyiseni ziphendule kulezi zikhalo esikhathini esingangenyanga ukusuka izolo. Okhulumela amaphoyisa KwaZuluNatal uCaptain Nqobile Gwala ukuqinisekisile ukuthi incwadi yezikhalo yethuliwe, wathi yedluliselwe kwiziphathimandla zombutho.