Kukhunjulwe obefunda ubudokotela eCuba
UNGQONGQOSHE wezeMpilo KwaZulu-Natal, uDkt Sibongiseni Dhlomo, ugqugquzele abafundi abafundela ubudokotela eCuba nabo bonke abantu abasha ukuthi bangafeli ngaphakathi uma benezinkinga.
Uthe ukukhuluma uma unenkinga kungasiza ukuthi umuntu athole isixazululo futhi zingabonakali zingaphezu kwamandla akhe.
UDhlomo ubekhulumela enkonzweni yesikhumbuzo sikaSandiso Siyabonga “Makhehla” Mkhize (22) waseMpendle obenza unyaka wesithathu ezifundweni zobudokotela eCuba.
UMkhize utholwe eseshonile eCuba ngo-Agasti 15. Kusolakala ukuthi uzibulele. Uchazwe njengomuntu obenamancoko, esebenza kanzima futhi ethanda ibhola. Umndeni kaMkhize ubukhala ngesikhathi kukhonjiswa izithombe zakhe kwikhompyutha.
UDhlomo uthe uyakhumbula uDkt Aaron Motsoaledi onguNgqongqoshe wezeMpilo kuzwelonke, ekhala ngesikhathi evalelisa abafundi ababeya eCuba ngo-2013 ngenxa yokubaluleka kwalolu hlelo lokuthumela intsha ukuthi iyoqeqeshelwa ubudokotela kuleliya lizwe.
“USandiso wayengomunye walabo bafundi esasibavalelisa ngo-2013, sasingazi ukuthi ngeke esabuya. Besilindele okukhulu kuye ngoba ubesemncane futhi enomdlandla. Sinabasebenzi abaneminyaka engu-75 nengu-80 abasaqhubeka nokusebenza. Lokhu kusho ukuthi uSandiso ubezosiza abantu bakuleli njengodokotela iminyaka engaphezu kuka-50,” kusho uDhlomo.
Utshele abafundi ukuthi basebenze ngokuzikhandla wathi uyakuqonda ukuthi bahlangabezana nezihibe ezifundweni zabo bekwelinye izwe.
“Uma ninezinkinga kufanele nisazise ukuze sizixazulule. Akufanele nifele ngaphakathi ngoba sifuna nihlale niphephile. Siyacela ukuthi nihlale ehostela lenu nikhumbule ukuthi iCuba yizwe enihlezi kulo isikhashana ngoba sisuke sinilindile lapha ekhaya,” kusho uDhlomo.
UNksz Zamasishi Madlala okhulumele umndeni wakwaMkhize ubonge uMnyango wezeMpilo ngethuba olinikeze umzala wakhe.
“Kusiphethe kabi okwenzekile kodwa akekho esimsolayo ngoba wonke umuntu unesikhathi sakhe,” kusho uNksz Madlala.
UDhlomo uthe amaphoyisa aseCuba ayaphenya ngodaba lukaSandiso, kulindeleke ukuthi isidumbu sakhe sibuyiswe ngesonto elizayo bese eyangcwatshwa.