Udlwengulwe washiywa ehlathini
UTHUKA izanya umfundi ka-Grade 12 othunjwe ephuma kotadisha esikoleni, wadlwengula washiywa ehlathini eNdwedwe ngaphandle kwaseThekwini.
Umfundi waseNombika High, eNdwedwe kuthiwa uyesaba nokubuyela esikoleni ngemuva kokuthunjwa owesilisa osekhulile, wamdlwengula wamshiya ehlathini ngoLwesibili ebusuku.
Lo mfundi kuthiwa usuke esikoleni ngo-4 ntambama kade etadisha njengoba belungiselela ukubhala izivivinyo zokuphela konyaka.
Abanye abafundi kuthiwa bese bephumile, kusele abakwa-Grade 12 betadisha.
Lo mfundi eseya ekhaya kuthiwa uhambe yedwa, kwaqhamuka imoto emnyana kwaphuma umshayeli wamfaka emotweni ngenkani wahamba naye. Kuthiwa lo mfundi uqale wafonela izihlobo zakhe ezitshela ukuthi usehlathini angalazi.
Umkhulu wakhe utshele Isolezwe izolo ukuthi umzukulu wakhe yize ethanda ukuqhubeka nezifundo zakhe kodwa uyesaba.
“Okumsabisa kakhulu ukuhlukumezeka ngalolu hlobo ephuma esikoleni. Akazi noma umsolwa uzobuye amvimbezele yini njengoba ephunyukile. Okubuhlungu kakhulu ukuthi ngesikhathi siyobika udaba emaphoyiseni aseNdwedwe ngokulahleka kwakhe, awazange asisize. Kuze kwangenelela othisha abamthole besebenzisa ifoni,” kusho umkhulu womfundi.
Lo mfundi uma ebuyela esikoleni uzoqhubeka ehambe ngendlela avinjezelwe kuyo nokwenza isimo sakhe sibe nzima.
Umkhulu walo mfundi uthe othisha basebenzise ubuchwepheshe bamafoni bembheka baze bamthola eboshiwe ehlathini.
“Ukwazile ukuqaqa izandla wafona ngocingo lwakhe. Utholwe esehlathini elikhona eNdwedwe. Simyise emtholampilo, kwabe sekubizwa amaphoyisa afika emtholampilo esezobhalisa icala,” kusho umkhulu womfundi.
Uthe ukhulumile nomzukulu wamyala ngokuba abuyele esikoleni njengoba sekusondele ukuba abhale izivivinyo zokuphela konyaka.
Okhulumela amaphoyisa KwaZulu-Natal, uLt Colonel Thulani Zwane, uthe amaphoyisa aseNdwedwe aphenya icala lokudlwengulwa kowesifazane oneminyaka engu-20, athungatha umsolwa. Uphenyo lusaqhubeka. Okhulumela uMnyango wezeMfundo KwaZulu-Natal uMnuz Sihle Mlotshwa, uthe kusemqoka kakhulu ukuphepha kwabafundi noma sebengaphandle kwesikole.
“Sinxusa umphakathi ukuthi ubambisane ukuqinisekisa ukuthi abafundi bethu baphephile. Siyazi ukuthi abafundi abaningi bamatasa bayazilungiselela ukubhala izivivinyo. Ubugebengu kumele sonke silwisane nabo. Siyazwelana kakhulu nalo mfundi ngokumvelele,” kusho uMlotshwa.