Bephelelwa yithemba abadukelwe yingane (2)
USUTHUNGATHE wakhathala umndeni olahlekelwe yingane eneminyaka emibili okuthiwa igcine ukubonwa idlala egcekeni kwamakhelwane, ngoMgqibelo.
UNksz Thabiso Mhlongo waseMabuyeni, Esikhaleni onguninomncane kaMpendulo Manqele (2), okusolwa ukuthi untshontshwe ngabathile ngesikhathi edlala egcekeni kwamakhelwane, uthe isimo simuncu kumalungu omndeni njengoba kuze kube yimanje akukho mkhondo abawutholayo ngendodana yabo.
Uthe ubehambe noMpendulo bevakashele kwamakhelwane oseduze nakubo, ngesikhathi ingane iphuma idlala egcekeni.
“Singene endlini lapho bekubaswe khona umlilo. Ingane ixakwe yintuthu yaphuma yayodlala ngaphandle. Ibidlala ngebhala, uzwakala umsindo walo.
“Kuphele imizuzu emibili umsindo unqamukile ngaphuma ukuyobheka ukuthi isishonephi ingane, kodwa ibingasabonwa,” kusho uNksz Mhlongo.
Uthe bayibheke nomakhelwane bancama baze bathinta namaphoyisa yabhekwa kodwa kuze kube manje abakayitholi. Uveze ukuthi usola ukuthi ithathwe ngothile ngoba ukunyamalala kwayo kwenzeke ngokuphazima kweso. Kuthiwa unina kaMpendulo ushone ngo-2015 eqeda kumbeletha, wabe esehlala noninomncane uNksz Mhlongo.
Uyise wale ngane ongowakhona endaweni kuthiwa naye uyithungatha nomndeni indodana yakhe.
Okhulumela amaphoyisa KwaZulu-Natal, uLt Colonel Zwane ukuqinisekisile ukuthi lolu daba lubikiwe esiteshini samaphoyisa eSikhaleni. Ucele amalungu omphakathi angase abe nolwazi olungaholela ekutholweni kwengane ukuthi athinte uWarrant Officer S Khumalo ku-083 5119 348.