Ugqugquzele osomabhizinisi ngokuthuthukisa umphakathi
UMENGAMELI omusha weDurban Chamber of Commerce and Industry uMnuz Musa Mkhunga ugqugquzele osomabhizinisi ukuthi bathuthukise impilo yabantu.
Esitatimendeni esithunyelwe yisikhulu esiphezulu seDurban Chamber, uNkk Dumile Cele, uMkhunga ongene esikhundleni sikaMnuz Zeph Ndlovu uthe osomabhizinisi akumele bakhathazeke ngenzuzo kuphela kodwa kumele bathuthukise abantu.
“Sifuna osomabhizinisi bashintshe impilo yabasebenzi nabantu baseThekwini. Siyazi bayathanda ukwenza inzuzo kodwa akumele bagxile kuyona kuphela mababheke nenhlalakahle yabantu,” kusho uMkhunga.
UNkk Cele uthe uma sebenomcimbi waminyaka yonke ozoba ngoSepthemba 7, eNkosi Albert Luthuli International Convention Centre ngo-18.30 ntambama bazokwethula uhlelo lokusebenza kwamabhizinisi aseThekwini olubizwa nge-Durban Business Code of Ethics.
“Siyazi amalungu ethu anezinhlelo zawo nemigomo yokusebenza kodwa sifuna ukunyusa izinga siyiDurban Chamber ngokwethula uhlelo olufuna ubuholi obuqotho. Sifuna kuphele inkohlakalo kube nabaholi abaqotho kuhulumeni nasemabhizinisini. Asikho bukhali nganxanye kodwa sifuna ubuholi obuqotho yonke indawo,” kusho uNkk Cele.
NgoLwesithathu, baqale izingxoxo ezibheka imigomo yokusebenza kwezinkampani ezihlukene emhlanganweni obuseDurban Country Club.
Kulesi sithangami sokuxoxa ngobuholi obuqotho nezinhlelo zokusebenza kwamabhizinisi bekukhona nomsunguli wenhlangano esiza umphakathi iGift of the Givers, uDkt Imtiaz Sooliman ogqugquzele osomabhizinisi ukuthi babeke izidingo zabantu phambili ngaphambi kokubheka inzuzo.
Uthe kufanele bawusize nomphakathi ukuze umhlaba ube yindawo engcono yokuphila.