Kuvikelwa abesifazane ematekisini
KWETHULWE uhlelo lokuvikela abesifazane ematekisini emuva kokwanda kwezigameko zokuhlaselwa kwabo, eGauteng.
NgoLwesithathu, abesifazane ngokubambisana nosomatekisi, iSoul City Institute for Social Justice bethule ngokusemthethweni uhlaka olubizwa ngeNational Taxi Charter for Women #SaferTaxisNow.
UNkk Matokgo Makutoane weSoul City Institute uthe bafuna abesifazane baphephe ematekisini.
“Sihlale sizwa ukuthi abesifazane badlwenguliwe, bathunjwa bahlaselwa besematekisini. Sifuna uphele lo mkhuba ngoba sebeyasaba ukugibela amatekisi,” kusho uNkk Makutoane.
UMnuz Theo Malele weNational Taxi Alliance uthe abashayeli bamatekisi banakho ukucwasa abesifazane ngendlela abanqoka ngayo yingakho nabo bebafundisa ngokubaluleka kokuhlonipha abesifazane.
“Uma abesifazane becwaswa ematekisini noma emarenke kufanele basibikele. Ngeke sibabekezele abashayeli abangahloniphi. Sifuna abesifazane baphephe ematekisini ethu ngoba bangabaphathi bethu ngaphandle kwabo singalala singadlile,” kusho uMalele.
Lo mkhankaso wethulwe eSoweto kanti uNkk Mmakatlego Wamphutlane weTownship Women’s Forum uthe abesifazane bavamise ukubekezela uma becwaswa wathi kodwa lokhu kufanele kuphele ngoba akwamukekile.
UNkk Thuli Ngubane one-website etholakala kumaselula i-Amandla. com uthe ucwaningo lwabo luveze ukuthi abesifazane abazizwa bephephile ematekisini.