Abebebhikisha eMariannridge bazokwakhelwa
BAZOKWAKHELWA izindlu ezingu-500 abantu baseMariannridge abavimbe imigwaqo engenela eDassenhoek, Tshelimnyama noya esibhedlela iSt Marys esibizwa ngokuthi yiRoma eduze kwasePinetown.
Lezi zindaba zivezwe ngungqongqoshe wezokuHlaliswa kwaBantu KwaZulu-Natal, uMnuz Ravi Pillay obeyohlangana nabantu baseMariannridge osekuphele izinsuku ezintathu bebhikisha.
“NgoSepthemba 14 sizoqala uhlelo lokwakha izindlu eMariannridge, zingu-500 izindlu okulindeleke ukuthi zakhiwe. Kuzophinde kuthuthukiswe nesimo samaflethi kahulumeni abantu abakhala ngaso,” kusho uPillay.
Ucele abantu ukuthi bayeke ukuvala imigwaqo uma kukhona abanganeme ngakho esho nokuthi ukudicilela phansi impahla kahulumeni kuyicala.
“Siyacela ukuthi nixoxisane nezinhlaka ezifanele uma kukhona eninganeme ngakho, ningawudli umhlaba kahulumeni osuke ubekelwe intuthuko ngoba lokho kusibuyisela emuva,” kusho uPillay.
NgoLwesithathu, abantu baseDassenhoek, Tshelimnyama, Klaarwater naKwaNdengezi bathwale kanzima ekuseni njengoba imigaqo ibivalwe ngamathayi avuthayo namatshe kwaphinde kwashiswa namarobhothi.
Abasebenzi neziguli ebeziya eRoma zithwale kanzima njengoba bekuvalwe nendlela eya kulesi sibhedlala.
IMeya yeTheku uNkk Zandile Gumede nayo icele abantu ukuthi bangadicileli phansi impahla uma bekhala ngezidingo ngoba lokhu kubambezela izinhlelo zentuthuko.
Amaphoyisa athe akekho oboshiwe embhikishweni waseMariannridge.