Ezinye izikhulu zamaphoyisa azinazo izitifiketi ‘zemvume’
UHHAFU wamaphoyisa asezikhundleni eziphezulu eNingizimu Afrika awunazo izitifiketi eziwagunyaza ukuthi asebenze ezibizwa ngama-clearance certificates.
NgoLwesithathu, amalungu ekomiti elibhekelele ezamaphoyisa lithole ukuthi kubaphathi bamaphoyisa abangu-941, abangu-281 basalinde ukuhlolwa ukuthi bakulungele ukuthola izitifiketi kuthi abangu-224 abakazifaki izicelo zokuthola izitifiketi. Abaphathi abangu-11 okubalwa kubo oMajor General, Lieutenant General noBridagier bafeyilile emuva kokuhlolwa kwabo bagcina bengazitholanga izitifiketi.
Lezi zindaba zivela emuva kokuthi obeyiNhloko yoPhiko lwezobuNhloli uMnuz Patrick Mokushane ekhale ngokubambezeleka kokuhlolwa kwabaphathi bamaphoyisa ukuze bathole izitifiketi zabo.
UMokushane wathi bangaphezu kuka-50 abophiko lwezobunhloli abangenazo izitifiketi ezibagunyaza ukuthi benze umsebenzi wabo. Wathi abanye abahambisani nezinhlelo zokuhlolwa ngenxa yokuthi bavivinywa ngamaphoyisa asemazingeni aphansi.
UMnuz Loernard Ramatlakane oyilungu le-ANC ekomitini lezamaphoyisa uzwakalise ukungenami ngalezi zindaba wathi, abalindele ukuthi abaphathi bamaphoyisa bangabi nezitifiketi ezidingekayo ukuze benze umsebenzi wabo kahle.
UMnuz Zakhele Mbhele weDA uthe akaqondi ukuthi kwenzeka kanjani lokhu ngoba abaphathi kufanele babe nazo zonke izimfanelo.
UMajor General Dumezweni Zimu uthembise ukuthi abaphathi bamaphoyisa bazolalela uma bevivinywa noma ngabe bahlolwa ngamaphoyisa asezikhundleni ezingaphansi kwezabo.
UKhomishana wamaPhoyisa osabambile uMnuz Lesetja Mothiba uthe banohlelo lokuqinisekisa ukuthi abaphathi bamaphoyisa bayazithola izitifiketi zaboo.