Igwilikile i-Ajax ngokudayisa uRivaldo

IBOMVU yimali i-Ajax Cape Town ngokudayisa isitobha seBafana Bafana uRivaldo Coetzee osezoyibamba kwiGlascow Celtic yaseScotland.

Lezi zindaba zivele ngesikhathi leli phephandaba lixoxa nosihlalo we-Urban Warriors u-Ari Efstathiou ngesikhathi sekhefu emdlalweni weMaritzburg United ne-Ajax eHarry Gwala Stadium, eMgungundlovu.

“Kuyisiko lethu kwi-Ajax ukukhiqiza abadlali abaphelela emaqenjini aphesheya. Alikho elinye iqembu elifika kithina. Sithatha abadlali abancane sibenze izinto ezinkulu. Esikwenzayo asikwenzi ngephutha kodwa yimiphumela yokunakekela izinhlaka zenkulisa. Senze enhle imali ngokumdayisa phesheya. Abekhona amaqembu abemfuna kodwa sikhethe ukuthi ayodlala phesheya ngoba usezuze okuningi eNingizimu Afrika. Usedlalile kwiAfrica Cup of Nations, Olympic Games waphinde wanqoba nesicoco seMTN 8,” kusho u-Efsthathiou.

UCoetzee (20) kuvela ukuthi bamdayise ngo-R13 million. I-Urban Warriors isizakhele igama ngokudayisa abadlali abasebancane emaqenjini aphesheya kwezilwandle.

Ngo-2011 leli qembu lidayise uThulani “Cream” Serero ngoR20 million. USerero wathengwa yi-Ajax Amsterdam. Abanye abadlali abadayiswe yi-Ajax emaqenjini aphesheya eminyakeni eyedlule nguSteven Pienaar, Enoh Eyong, Bryce Moon, Thembinkosi Fanteni, Daylon Claasen, Stanton Lewis, Nathan Paulse noRussell Mwafulirwa.

“URiva uqale ukudlala eqenjini lesizwe eneminyaka engu-17. Yize sikholelwa kubadlali abasebancane kodwa asibajahi. Angingabazi ukuthi uzofika phesheya enze kahle. Unekhono eliyisimanga uRiva. Kunzima ukuthi ngithi ngeke enze kahle ngoba angiyiboni into ezomvimba. KwiCeltic uyosebenza nomunye wabaqeqeshi abahlonishwayo emhlabeni uBrendon Rodgers. URiva ungaphambili ngeminyaka emihlanu kuneminyaka yakhe,” kusho u-Efsthathiou.

Umqeqeshi we-Ajax, uStanley Menzo, wethemba ukuthi uzophumelela eScotland wathi kuzofanele bathole umdlali ozovala isikhala sakhe ngokushesha.