Ugaqele indondo yegolide uMagazi
ISITOBHA seMaritzburg United, uSiyanda “Magazi” Xulu, sigaqele isicoco saso sokuqala eNingizimu Afrika.
Kusasa ngo-8.15 ebusuku iTeam of Choice izoshukana neSuperSport United emlenzeni wokuqala we-semi final yokuqala yeMTN 8 eLucas Moripe Stadium.
Umlenze wesibili useHarry Gwala Stadium, eMgungundlovu ngoSepthemba 9. UXulu (26) usezuze izinto ezinkulu empilweni yakhe edlala ibhola kodwa akakaze ayithole indondo yegolide eNingizimu Afrika. Udlale amasizini amathathu kwiMamelodi Sundowns waphinde wayibamba amabili kwiKaizer Chiefs. Ngaphandle kokudlala kuleli, uXulu useke wamenywa yiBarcelona yaseSpain ne-Arsenal yase-England eyozama inhlanhla.
KwiBafana Bafana udlale imidlalo eyisithupha kanti useke wayibamba naphesheya kwezilwandle kwiFC Rostov yaseRussia. Kuleli qembu wemuka nesicoco iRussian Cup.
Exoxa nabezindaba ngemuva komdlalo weTeam of Choice ne-Ajax Cape Town eHarry Gwala Stadium, eMgungundlovu, uXulu akazange akufihle ukuthi ukubheke ngamehlo abomvu ukuzibula ngesicoco eNingizimu Afrika.
“Ngike ngasinqoba isicoco phambilini eRussia kodwa lapha eNingizimu Afrika bengingakabi nayo inhlanhla. Ngike ngafinyelela emidlalweni yamanqamu neyandulela owamanqamu kodwa ngangaba nayo inhlanhla. Kuyiphupho lami elikhulu ukunqoba isicoco eNingizimu Afrika. Kungaba yisimangaliso uma ngingasinqoba neqembu langakithi KwaZulu-Natal. Njengeqembu sizokwenza konke okusemandleni ethu ukunqoba lesi sicoco (MTN 8),” kusho uXulu.
Lesi sitobha saKwaMashu, eThekwini, besikhona iChiefs ithelwa othulini yi-Ajax ngo 1-0 kowamanqamu weMTN 8