Akahambe uKomphela: abeChiefs
ABALANDELI beKaizer Chiefs bafuna agawulwe yizembe umqeqeshi, uSteve “Mphathi” Komphela, abakholwa wukuthi usehlulekile ukulungisa izinto kuleli qembu.
Izolo, iFree State Stars ibe yiqembu lokuqala ukuvulela izembe kumqeqeshi, ikhomba indlela uSammy Throughton obekusaphele amasonto ambalwa eqashiwe.
UThroughton uhlale ebhentshini le-Ea Lla Koto emidlalweni emibili ye-Absa Premiership obekungoweligi behlulwa AmaZulu eThekwini nabadlale kuwona ngokulingana ngo-2-2 neBidvest Wits eGoble Park ngoLwesithathu ebusuku.
Indawo yakhe ithathwe nguLuc Eymael ofike kuleli ezoqeqesha iPolokwane City. U-Eymael ugcine esehamba amacala kuleli emuva kokujoyina iBloemfontein Celtic agcine engahlalanga ebhentshini layo.
Uma konke kuya ngentando yabalandeli beChiefs, uKomphela uzoba ngumqeqeshi olandelayo ozokhonjwa indlela yiqembu lePremier Soccer League (PSL) ngesizini ka-2017/2018.
IChiefs iphinde yahlulwa yiSuperSport United ngo-2-1 emdlalweni wePremiership eFNB Stadium ngoLwesithathu ebusuku. Lokhu kwenzeke kusaphele amasonto amabili Amakhosi eguqiswe ngaMatsatsantsa koweMTN8 eThekwini.
Emdlalweni wangoLwesithathu, abalandeli bakhombise ukudinwa, balimisa ngesihloko bekhuza iziqubulo ezithi “USteve Akahambe.” Lokhu kuqhubekile ngisho uKomphela esekhuluma nabethelevishini.
UKomphela uthe ngeke aliphonse ithawula, wakhala ngokulahlekelwa ngu-Erick Mathoho umdlalo usanda kuqala.
UMathoho uthole ikhadi elibomvu ngomzuzu wesikhombisa umdlalo uqalile emuva kokudlalisa kabi uBradley Grobler. “Bekufanele siqhubeke, singaphonsi ithawula emuva ngisho sekuphume ikhadi elibomvu. Yibhola leli, uma kwenzeka uthola ikhadi elibomvu kufanele ubhekane nakho. Ngicabanga ukuthi esiwombeni sesibili sidlale kangcono kakhulu. “Bekunomfutho, sakha amathuba ambalwa. Besingadlala ngokulingana, kube yikho nje ukuthi silahlekelwe nguTower usanda kuqala umdlalo kodwa lezi yizingqinamba okufanele sibhekane nazo,” kusho uKompela.
“Sidlale imidlalo emibili. Uma ucabanga ukuthi bonke ubunzima obubhekene nawe futhi awuqinile ngokwanele ukuthi ungadlula kubo, kukhona okungalungile ngawe.
“Lo msebenzi udinga ukuthi uqine ngokomqondo nokwethemba. Uma ukholelwa kokwenzayo nabantu osebenza nabo, akukho okunye ongakwenza. Uma ubheka emdlalweni wanamuhla (ngoLwesithathu), unzima unjalo kodwa besingadlala ngokulingana. Kodwa akukho ongakwenza, wukubuyela emuva uyosebenza.”
Leli phephandaba lihabule izindaba zokuthi iChiefs izoqasha umqeqeshi waphesheya kwezilwandle uma ichitha uKomphela.
Umqeqeshi ozovala isikhala sikaKomphela kungenzeka alandwe e-United Kingdom.