ICaptur ethuthukisiwe

ABAGOQILE izandla kwaRenault eNingizimu Afrika njengoba izinto zibahambela kahle ngokuthengwa kwezimoto zabo kodwa balokhu beqhubekile nokwethula ezintsha.

Selokhu kuqale unyaka bathi sebedayise izimoto ezingaphezulu kuka-10 000. Lokhu kungenxa yokuthi bethule izimoto eziningi muva nje okubalwa kuzo iRenault Clio RS, Sandero nezinye.

Ngesonto eledlule baqhubekile nalokhu njengoba bethule iCaptur ethuthukisiwe. ICaptur itheleke eNingizimu Afrika ngo-2015. KwaRenault bathi sebedayise angaphezulu kuka-6 500 noma angu256 ngenyanga. Kubonakala sengathi bazoqhubeka nokwenza kahle emakethe kwaRenault uma ubheka inani lale moto nanezinto ephuma nazo.

Bheka ngoba phambilini ebishibhe kunazo zonke bekuyiCaptur 66kW Turbo Expression ebibiza uR249 000. Leyo ayisekho kodwa esikhaleni sayo kwafakwa iTurbo Blaze 66kW yona eqala kuR229 900.

Okwenze kwehla lelo nani ukukhishwa kwezinto ezifana neMediaNav infotainment touchscreen nokunye.

Le moto yakhelwe phezu kwesisekelo seyakwabo iRenault Clio kodwa umehluko ukuthi yona ithe ukuphakama futhi yavuleka. Umhlaba iwushiye ngo-170mm. KwaRenault bayichaza njengokuthi izwakala njengeSUV yabe isivuleka njengeMulti-Purpose Vehicle bese ishayeleka njengemoto encane.

Izinto ezishintshile kuyo zihlanganisa igrille esiyenziwe kabusho, amalambu amasha eLED Pure Vision Lights anamaDaytime running lights amise okukaC njengezimoto zakwabo, kunemibala emisha ehlanganisa neshaya ngokhakhayi oluhlukile kunombala wemoto futhi inamarimu amasha angu-17 inch Black & Chrome Alloy.

Uma ujika emakhoneni amalambu akhanyisa kakhulu ngalapho ujikela ngakhona.

Uma uthanda ufaka ukhakhayi lwengilasi.

Ngaphakathi ine-steering esisha, u dashboard owakhiwe wathamba uma uwuthinta okuyinto efanayo nasezicabheni, i-armrest entsha phakathi nendawo ngaphambili kanjalo negiya elisha.

Ngesikhathi yethulwa eGoli ngoLwesihlanu amakhaza abeshubisa umnkantsha kwazise belikhithikile ezintabeni zokhahlamba. Lawo makhaza sizwe ngendaba singena kwiDynamique njengoba inezihlalo zesikhumba ezifudumalayo.

Iphuma neRenault MediaNav touchscreen kwiDynamique, HillStart Assist, keyless entry, rear park sensors, amawindi kagesi, amalambu azikhanyisayo kanjalo nama-wiper azishayayo uma lina, Bluetooth, cruise control ne-speed limiter.

Uma unganazo izihlalo zesikhumba uyakwazi ukuthola eziyindwangu ezinamakhava okwazi ukuwakhipha uwawashe uma engcolile.

IBlaze iphuma neR&Go eyenza ukuthi usebenzise iselula yakho ukudlala umculo, ukuveza inkombandlela nokunye. Uma uyishiya iselula emotweni iyakwazi ukubanga umsindo ikukhumbuze ukuthi uyayikhohlwa.

Njengoba ngike ngasho ukuthi ithe ukuvuleka kancane, abagibeli banesikhala semilenze esifinyelela ku-21.6 cm kanti ibhuthi layo lihlukana kabili ngaphakathi futhi uma ufuna isikhala sande ulalisa izihlalo sifinyelele ku-1 235 litres. Izinjini Namandla

IRenault Captur ihlukene ngezinjini ezintathu ezine-turbo okuyi-66kW Turbo, 1.2 litre 88kW Manual ne-EDC okuwumshini ozishintshayo kanjalo ne-1.5 dCi kadizili.

I-1.5 dCI bathi ngebanga lika100km isebenzisa amalitha angu-3.6 kadizili. Ngesikhathi siyivivinya eGoli igcine inginika u-5.1 litres ngebanga elifanayo nokuyinto egculisayo.

Emgwaqeni ithule futhi ukuphakama kwayo kuyayisiza ukuthi ingezweli emabhampini kanjalo nasemgwaqeni eyibhuqu.

Uma ungena kwi-66kW Turbo uyawuzwa umehluko phakathi kwayi ne-1.5 dCi ngoba yona iyashesha ukungena ejubaneni ngaphandle kokulokhu uqala phansi amagiya. Yona ngebanga lika-100km bathi isebenzisa amalitha angu-5.4 kaphethroli.

Eyokugcina yi-1.2 litre 88kW Turbo engine etholakala

- New Renault Captur 66kW Blaze R229 900

- New Renault Captur 66kW Dynamique R269 900

- New Renault Captur 1.5 dCi Dynamique R294 900

- New Renault Captur 88kW Dynamique R294 900

- New Renault Captur 88kW EDC Dynamique R309 900