Ayisokoli emakhoneni iMINI JCW Countryman
NGESIKHATHI ngibuka isimo sezulu saseWestern Cape sangoLwesibili ngivele ngacabanga ukuthi kusho ukuthi umuntu uzoshayela kabi ngoba besikhomba ukuthi lizobe lina.
Ngakolunye uhlangothi bengijabule ngenxa yokuthi lesiya sifundazwe singesinye sezigubazelwe yisomiso esinzima.
Uma sifika esikhumulweni sezindiza eGeorge ekuseni izulu liguqubele futhi kuheleza nomoya obandayo.
Nazi izimoto esizozivivinya zikelile, yiMini John Cooper Works Clubman neCountryman.
Ngigxume ngingene kwiClubman ngenxa yokubalekela amakhaza. Inhliziyo yami ifike yakhululeka ngaphakathi uma ngibeka isinqa esihlalweni somgibeli ngaphambili ngisifica sishisa.
Akukhona ukuthi sishisa ngoba kukhona okade ehleli kepha yingoba imoto iyaduma futhi kucishizwe ibhathini lokushisisa isihlalo elikhona nasesihlalweni somgibeli.
Ngemuva kokuhamba ngayo isikhashana, ngichazwe wukundoda kwenqawe yayo. Engikuqaphelayo wukuthi umsindo wangaphandle mkhulu ngaphathi futhi nokunyathela kwamasondo ayo anamarimu amahle angu-18 inch kuyezwakala.
Ususpension wayo uthe ukuqina imbijana lokho okuyenza ukuthi izwele emabhampini.
Yona iJohn Cooper Works Clubman iyashesha emgwaqeni. Lokhu kungenxa yenjini yayo engu-2.0 kaphethroli. Ikhahlela amandla angu-170 kW okuwamandla angu-29 kW ngaphezu kweMINI Cooper S Clubman netorque engu-350 Nm.
Ine-6 speed manual transmission noma i-8 speed Steptronic sports transmission. Ukusuka ku-0 iye ku-100km/h kuyithatha imizuzwana engu6.3 ezishintshayo kanti ijubane elikhulu lingu-238 km/h. Uma uyinyathela izinqawe zayo ezimbili ngemuva zisuke zibhonga futhi uma ushintsha iyaqhuma kuhle kweVrr Pha.
Endleleni imvula iyaqala iyayidliva. Kuyaziwa-ke ukuthi uma lina umgwaqo uyashibilika. Nokho iJohn Cooper Works Clubman inamathele emgwaqeni kwazise idonsa ngawo womane amasondo. Uma kukhona elishibilikayo amandla iwafaka esondweni elinamathele ukuze ingaphaphalazi. Phezu kwalokhu ine DSC.
Le moto ayigabile nje kuphela ngendlela ehamba ngayo emgwaqeni kodwa nobuhle ibuphethe. Phakathi kwezinto ehluke ngazo kuneClubman eyejwayelekile kubalwa imibala egqamile ngaphandle njengoRebel Green, amalambu eLED efika nawo ngaphandle kokunenezela imali, iqoshwe uJohn Cooper Works nakumabrake calipers abomvu, roof spoiler ngemuva nokunye.
Ngaphakathi inezihlalo zabagibeli abahlanu ezingama sports seats. Ibhuthi layo lingu360 litres kanti uma ulalise izihlalo zangemuva iba ngu-1 250. Isiteringi siyisikhumba futhi sinamabhathini okulawula umsakazo noma icruise control futhi esinama-pedal shift ngemuva, ine-heads up display, ine touchscreen esingu-8.8 inch esiyindilinga ngaphakathi lapho ubona khona isimo semoto, ukudlala umsakazo noma ikhamera eveza ingemuva uma uhlehla. Ukwazi ukuxhumanisa iselula yakho nemoto ngokufaka i-app yakhona bese ukwazi ukukhetha indawo ozoya kuyo kwiselula bese ivela emotweni.
Ezinye izinto ephuma nazo yi-2 zone aicon nesunroof.
Ngakwezokuphepha iphuma neBrombo sports brake system, Dynamic Stability Control neDynamic Traction Control. Inama-airbags ngaphambili nasemaceleni futhi iyabika uma izoshayisa. Countryman
Uma ungena kwiCountryman umehluko uyawuzwa ngoba yona ithe ukuba ntofontofo. Yiyo engingayithatha ngenxa yesimo semigwaqo eminingi yaseNingizimu Afrika enamabhampu. NjengeClubman, nayo idonsa ngawo womane amasondo.
Injini yayo nayo ingu-2.0 kaphethroli edonsa ngawo wonke amasondo. Ikhahlela amandla angu-170 kW netorque engu350 Nm. Ine-6 speed manual transmission noma i-8 speed Steptronic sports transmission. Lo gearbox ozishintshayo yiwo engithole ithuba lokuwuzwa futhi awukhalisi nakancane. Iyakutshela yona uma sekufanele ushintshe uma ukhethe ukuthi uzoyishintsha wena kuma-pedal shifts. Uma uwaciphiza futhi ishintsha manje ngisho ngabe amagiya uwasa phezulu noma uyawehlisa ufuna ukushaya i engine braking.
Ukusuka ku-0 iye ku-100km/h kuyithatha imizuzwana engu6.5 ezishintshayo kanti ijubane elikhulu lingu-234 km/h.
Ngebanga lika-100 km eshintshwayo iphuza amalitha kaphethroli angu-7.4 kuthi eshintshwayo abe ngu-6.9.
Uyayikhetha wena ukuthi ufuna ihambe kanjani ngokushaya inkinobho engaphansi kwegiya uyifake kuSport, Mid noma kuGreen ukuze yonge. KuSport idumela phezulu nesitiringi sithi ukuqina. Iqhubeka ekhasini 7