Akanikwe owokuhlobisa izimoto
NGIYAKHULEKA eziNdlovukazini zomgwaqo, ngiyaphaphatha kwinzalabantu eziphethe kwezomgwaqo, ngithi sonke masishaye ama-hazard ethu egameni lembokodo, siqinisekise ezokuphepha ngaphambi kokuthi sichezukele lapho kuphephe khona ukuze sishaye esidume ngazo.
Le nyanga yesibhuda ibe yinyanga enzima kumame owazalayo njengoba sithe sisababaza isililo saseDalton saqhuma eNamba 9, KwaXimba, eMkhambathini. Kodwa-ke angikho lapho yize inhliziyo yami isenesibibithwane.
Ngithi ake sibuke okuhle nokuyivuso esifanelwe ukuthi sonke sibambelele kukho siye phambili siyisizwe kwezezimoto. Kunogogo u-Esther Mahlangu odume ngeminyaka yama-1990 ngokuhlobisa insimb’yamaJalimane iBavaria Motor Workes (BMW) 525i. Lo magogo usebenzise ubuciko bakhe ukudweba imibala yamaNdebele kule moto okuyinto engajwayelekile. Abanye bayenza ihlaya le moto ngesikhathi iqala ukuvela emehlweni omphakathi kanti abazi ukuthi abakwaBMW SA bazoyithanda baze bafise ukuhlangana nale ntomb’endala.
Kunezizwe ezaziwayo ngokuthi zimandla ekuhlobiseni izimoto kangangokuthi uyibona imile kungekho mnikazi phakathi ukuthi yimoto eke yadlula esandleni sabantu baluphi uhlanga.
Le ntokazi eneminyaka engu-81 iphinde yabizwa abakwaBMW ukuthi ihlobise unyanyavu lwe BMW 760Li Individual. Kulokhu-ke uGogo uMahlangu akabange esayidweba ngaphandle kodwa wayidweba ngaphakathi maqede yayokhangiswa eLondon embukisweni wezobuciko. Ngesonto eledlule lona leli phephandaba eliwela umfula ugcwele likuvezile ukuthi lolu huntshu lweBMW seluyabuya luza eNingizimu Afrika lapho luzobonwa abantu abaluqondayo lolu hlobo lobuciko bamaNdebele.
Angimsoli uMengameli uJacob Zuma ngokuhlonipha le ntomb’endala ngeOrder of iKhamanga ngo-2016 ngokuba yiqhawe.
Umbono wama hazard uthi kungaba ngcono ukuthi uGogo Mahlangu anikezwe umsebenzi wokuhlobisa zonke izimoto zakwaBMW. Lokho kungamunika isinkwa sakhe nesizukulwane sakhe kwenze ukuthi angaphinde aswele futhi kuvikeleke ubunikazi balobu buciko ezimotweni.
Angithi yikhona lokho okwenziwa yizinsizwa zaseJalimane oHans Werner Aufrecht no Erhard Melcher ngo-1967 ngesikhathi bethatha iMercedes-Benz beyitona bayihlobisa base beyibiza nge AMG.
Umsebenzi wokukhuphula izinga leBenz libe yi-AMG wenziwa yinkampani edlelana nabakhi balezi zimoto. Uma uthenga imoto yakwaBenz ufuna ibe yi-AMG isuke izokwakhiwa bese ibizelwa ochwepheshe bakwa-AMG kube yibo abafaka imihlobiso nenjini ekhuthaziwe. Lokho kusho ukuthi umsebenzi wala madoda amabili usaqhubeka nezizukulwane ngezizukulwane.
Nomsebenzi kaGogo Mahlangu kuyajabulisa ukuthi uyatholakala uma uwufuna ezimotweni ezikhethekile zakwaBMW kodwa kungangcono ukuthi kube yinkampani kaGogo enikwa umsebenzi wokwenza lo mhlobiso ukuze ubunikazi balobu buciko bungagcini sebungobomunye umuntu.
Ngakho uma wenza into ethile mayelana nokuhlobisa imoto ungacabangeli eduze zama ukucabanga ukuthi ungakwazi yini ukuqhubeka nakho uma unganikwa ithuba.
Hhayi-ke sibonge ngokubamba iqhaza sigubha inyanga yesibhuda ngokufunda ama hazard athinta sona kakhulu kule nyanga ka-Agasti. Sesingawavala ama hazard ethu sibuyele emgwaqweni sishayele ngesinono sekati sigcine yonke imithetho yezokushayela injengoba injalo ukuze sihlangane sisaphila ngesonto elizayo.
Uma ufisa siyiqhube le ndaba ngena ekhasini lethu Igedlela Lami with Sthembiso Shangase kuFacebook. Yimi owenu nali ikheli ngezansi hazardiso@gmail.com