UPoulter uthi khumu emijahweni
UMPETHA ovikela isicoco seSouth African National Rally neCrosis-Country, uLeeroy Poulter, usethathe isinqumo sokuhoxa ezimotweni zomjaho kule sizini.
UPoulter uthathe lesi sinqumo ukuze ezokwazi ukululama kahle njengoba ahlizwa ebuchosheni ngonyaka edlule ekhishwa isimila.
Yize ukuhlinzwa kwakhe kwaba yimpumelelo kodwa uPoulter ukubone kunzima ukululama wabe esenquma ukugxila esimweni sempilo yakhe.
“Akubanga yisinqumo engisithatha kalula. Mina neqembu lami sikhulume kabanzi ngalolu daba. Yize ngikwazi ukushayela kodwa ngibone ukuthi umzimba wami udinga isikhathi esithe xaxa sokululama,” kusho uPoulter.
UMengameli weqembu leToyota Gazoo Racing SA, uGlyn Hall, uthe useseka ngokuphelele isinqumo sikaPoulter.
“ULeeroy uyilungu elibalulekile leqembu lethu futhi ube neqhaza elikhulu ekuthuthukiseni iToyota Hilux. Umdlalo wethu ufuna lukhulu futhi ukunakekela impilo yakho kubaluleke kakhulu. Ngakho sifisela uLeeroy konke okuhle ekululameni kwakhe,” kusho uHall.
UPoulter uthe umdlalo wezimoto uyimpilo yakhe njengoba azibandakanye kusukela emncane.
“Ukungancintisani kuzoba yinto enzima kakhulu kodwa kumele ngimelane ngibe neqiniso ngesimo sami sempilo. Ukuhlaba ikhefu manje kungenzeka ukuthi yikhona Kanye engikudingayo,” kusho uPoulter.
UPoulter usenqobe inqwaba yemiklomelo kusukela ezimotweni zemijaho kuya kwi karting. Uyena ozihola phambili kwiSouth African Cross-Country Series.
Leli qembu lithembise ukwenza isimemezelo ngokuzokwenzeka kuze kuphele isizini.