Omaskanda bagabisele abalandeli ngoweNgqwele
BANIKEZE abantu umuzwa wokuthi kuzobe kunjani kwiNgqwele kaMaskandi eCentrum Park, ngaseWorkshop, ngoMgqibelo abaculi abazobe beyingxenye yalo mcimbi.
Laba baculi, okunguBahubhe noQhoshangokwenzakwakhe batheleke eWorkshop kwaba ncane indawo ngoMgqibelo emini.
Kuqale kwafika uQhosha, obephuma kuKhozi FM ngawo lo mcimbi lapho ebekhuluma khona ngawo. Ufike wazihlalela ngemuva kodwa ngokuhamba kwesikhathi umsakazi woKhozi, uZimdollar, ozobe ephethe uhlelo kwiNgqwele wamcela esteji.
UQhosha, uqale wavumisa abantu ingoma ngaphambi kokushaya eyakhe yakamuva ethi Amavukane Asemaningi. Ucele abantu ukuthi bagide naye wabe esebapha izikibha.
Kuthe kungazelele muntu kwatheleka uBahubhe waqinisekisa kubantu ukuthi nakanjani uzobe ekhona koweNgqwele.
“Ngizobe ngiyokwenza into eyodwa nje, ngiyogijima ngenqina. Ngizogijima baba, khululeka, kuyoze kuyolamula ukushona,” kusho uBahubhe.
Ubuze abantu ukuthi bafunani kuye ngoba akazile ukuzocula ngoba usekhefini.
“Engani liyaba khona ikhefu kwaloliwe. Namike. Ngiyadlala bafowethu, ngizoshaya eyodwa ngoba ngenza into ethandwa ngabantu mina,” kusho uBahubhe.
Ube eseshaya ingoma yakhe entsha ethi Izihlwele ayihlabe waze wacela abantu ukuthi baphakamise u-7 phezulu, nokuyinto asezakhele udumo ngayo.
UBahubhe usele noQhosha, Amageza Amahle, Igcokama Elisha, Khuzani, Mroza Fakude, Osaziwayo, Imfezemnyama, Indodakazi Yentandane noMjikijelwa kubaculi abangu-10 okuzokhethwa kubo Ingqwele.
Iphini loMhleli weziNdaba kwiSolezwe, uSizwe Blose, ngesikhathi likhuluma kuKhozi FM ngoMgqibelo emini, lithe abantu yibo abakhethe abaculi abafinyelele kulesi sigaba. Uthe kwaqala kwaba abangu-30 kwase kuyavotwa njengoba sekusele abangu-10.
Amathikithi atholakala ngo-R80 eComputicket kanti umcimbi uqala ngo-10 ekuseni.
Bheka ekhasini 16.