UZuma uzophoswa imibuzo ePhalamende
UMENGAMELI Jacob Zuma kulindeleke ukuba ahlonywe imibuzo ngamalungu ePhalamende ngoLwesithathu ngemuva kwamasonto ambalwa esinde kwisiphakamiso samaqembu aphikisayo sokuba achithwe.
UZuma uzovela ePhalamende emuva kokuthi i-ANC iqale uhlelo lokuthathela izinyathelo amalungu ayo asolwa ngokuvota namaqembu aphikisayo emzameni yokuchitha umengameli.
Ngeledlule iPhini likaMengameli, uMnuz Cyril Ramaphosa, lisivikele isinqumo sikaKhongolose sokuthathela izinyathelo ongqongqoshe abasolwa ngokuba ngosikhwiliphambananobhoko.
URamaphosa uthe lolu wudaba lwangaphakathi enhlanganweni, wengeza ngokuthi uKhongolose udinga ukunikwa isikhathi ukuze ukwazi ukulungisa izindaba zawo.
Ngakolunye uhlangothi, uZuma ubukeka ezothwaliswa kanzima ngamalungu ePhalamende azobe efuna izimpendulo mayelana nokulawulwa kombuso yidlanzana nesimo somnotho wezwe.
Ngesikhathi egcina ukubonakala ePhalamende ngoJuni uZuma wathembisa amalungu ePhalamende ukuthi uzosungula iKhomishini ezophenya kabanzi mayelana nokulawulwa kombuso yidlanzana.
Kodwa amaqembu aphikisayo athi asephelelwa yisineke sokulinda ukuthi kusungulwe iKhomishini ikakhulukazi njengoba nomndeni wakwaGupta usudayisa amabhizinisi awo.
Amaqembu aphikisayo akhomba ngenjumbane uZuma athi uyathinteka ekulawulweni kombuso yidlanzana kodwa yena uyaphika.
Inhlangano i-AfriForum isanda kuya enkantolo iyophoqa ukuthi kube nguRamaphosa osongula iKhomishini ngoba ithi uZuma uyathinteka.
Umnotho waseNingizimu Afrika awukaze ukhule ngaphezu kuka-5% kusukela ngo-2008, ngesikhathi senzikamnotho emhlabeni. INingizimu Afrika yakleliswa namazwe angenzi kahle kwezomnotho ngemuva kokuthi uZuma enza izinguquko kwikhabhinethi yakhe.