Usaqhubeka nokuba yisibani samaBoks
ULOKHU eqhubeke njalo nokuhola iqembu lombhoxo amaBhokobhoko njengesibani uSiya Kolisi osephenduke isethenjwa saleli qembu njengoba lakhiwa kabusha.
Lesi silomo sasePort Elizabeth ubungafunga ukuthi sixhunywe kugesi sisiza iqembu lesizwe linenebula i-Argentina ngo 44-23 koweRugby Championship ngoMgqibelo ebusuku eSalta, e-Argentina.
Kulo mdlalo uKolisi, oshaye ama-try amabili ukusiza u-Allister Coetzee athole iwini yakhe yokuqala ekuhambeni, ubengasebenzi yedwa enkundleni kodwa ukubonana kwakhe no-Elton Jantjies kubabeke ezingeni elehlukile abafana baka-Eben Etzebeth.
Kusukela uKolisi ethathe izintambo zokuba ukaputeni kumaStormers indlela adlala ngayo ishintshe kakhulu njengoba kunguyena ohlale egqamile emidlalweni yaleli qembu yakamuva.
Nomqeqeshi uCoetzee uyavuma ukuthi ukukhula kukaKolisi sekulikhulisile iqembu kanti kuwusizo kakhulu njengoba engekho ukaputeni uWarren Whitely.
“Awekho amaningi engingawasho ngoKolisi kodwake izwe liyazibonela. Akadlile ngazokukhipha emlonyeni kodwa okuningi ukusho ngendlela adlala ngayo uma esesenkundleni.
“Ngijabule kakhulu ukuthi sinqobile lapha futhi ngikholwa wukuthi kuzosisiza ekukhuphuleni ukuzethemba. Angifuni ukuziqhathanisa namanye amazwe kodwa uma ubheka lapho sikhona manje bese ukhumbula ukuthi izinto bezinzima kanjani ngonyaka odlule uyaqonda ukuthi kumele ngijabule,” kusho uCoetzee.
Umdlalo olandelayo wamaBhokobhoko ungoSepthemba 9 ne-Australia ePerth.
I-Australia, enephuzu elilodwa ne-Argentina, sebeshaywe kabili bese kuthi amaBhokobhoko neNew Zealand baqhwakele ngamaphuzu ayisishiyagalolunye.
“Asikafiki ezingeni lamazwe afana neNew Zealand kodwa ukuba fithi kwabafana nendlela nje iqembu elibumbene ngayo ngizizwa ngingenalo uvalo ngesisazobhekana nako. Ungabuka sengathi bancane ngokweminyaka abadlali bami kodwa isipiliyoni esikubona singakushiya umangele.”
Sisekuzo ezombhoxo, iCell C Sharks yenze ezibukwayo inqoba ngo 21-20 kwiWestern Province koweCurrie Cup ngoMgqibelo eNewlands Stadium. Yize iSharks inqobe umdlalo wayo wesihlanu kulandelana kodwa isalele endaweni yesibili kwi-log lapho isele khona kwiProvince ngephuzu elilodwa emidlalweni eyisithupha. Womabili la maqembu asedlale imidlalo eyisithupha.