Akunani ukuwina kwabokuhamba
UMENGAMELI we-Athletic South Africa, u-Aleck Sikhosana, akakhathazekile ngokukhonya kwabagijimi bangaphandle kwiMandela Day Marathon.
Abasubathi bangaphandle sebezakhele igama ngokuzidlela amahlanga kulo mjaho okuhlonishwa ngawo iqhawe lomzabalazo, uNelson Mandela, owaba ngumengameli wokuqala wentando yabantu.
UTekletsion Kassahun wase-Ethiopia nguyena odle umhlanganiso kwabesilisa. Ushaye intambo ngemuva kwamahora amabili (02:28:31) kwathi kwabesifazane uMamorallo Tjoka waseLesotho wadla ubhedu.
Bobabili bahlomule ngoR100 000 umgijimi ngamunye. USikhumbuzo Seme nguyena umgijimi wokuqala waseNingizimu Afrika ongene kuqala ethatha indawo yesihlanu.
Nakwabesifazane umgijimi wokuqala othathe indawo yokuqala kube nguCharne Bosman othathe indawo yesithathu.
“I-USA ike yabhekana nesimo esifanayo lapho abagijimi bangaphandle bebezenzela khona. ILondon Marathon nakhona bekuyinto efanayo. IBoston Marathon nayo inqontshwa ngabagijimi baseKenya naseEthiopia. INew York Marathon ike yanqotshwa nguWillie Mtolo noHendrick Ramaala. Kumele siqonde ukuthi lona ngumjaho ovuleleke kuwona wonke umuntu.
“Lo mjaho uyakhula. Yonke into inesikhathi sayo. NakwiComrades Marathon kuke kwaba yinto efanayo kodwa manje sebebuye ngezinkani. Angingabazi ukuthi eminyakeni ezayo abagijimi bethu bazokwenza kangcono,” kusho uSikhosana.
Ngo-2012 umjaho wanqontshwa nguBrighton Chipere waseZimbabwe kwabesilisa kwathi uMuchaneta Gwata waseZimbabwe wadla ubhedu kwabesifazane.
Ngo-2013 kuphinde kwakhonya abagijimi bangaphandle kwabesilisa nabesifazane. UBekele Eshetu wase-Ethiopia waphuma phambili kwabesilisa kwathi kwabesifazane uChiyedza Chokore waseZimbabwe wadla umhlanganiso.
UThobani Changwe nguyena odle umhlanganiso ngo-2014. UChangwe, odabuka eNkwezela, eBulwer, nguyena kuphela umgijimi walapha oseke wanqoba umjaho.
Ngo-2015 uMatela Makhetha waseLesotho waphuma phambili kwathi uSelam Abere wase-Ethiopia wawina isicoco kwabesilisa.
“Kuningi okusamele sikwenze kodwa ngeke sikwenze ngesikhathi esisodwa. Njengamanje sinezinhlelo zokuthi sikhulume ne-IAAF ukuthi iMandela Day Marathon ibe sohlwini lwemijaho yomhlaba. Umjaho ungomkhulu ngoba kuhlonishwa iqhawe lomzabalazo. Lapha akuzelwe kuphela ukuzolwela izikhathi kodwa kuhlonishwa iqhawe,” kusho uSikhosana.
Ngonyaka odlule uTsepang Ramonene waseLesotho nguyena odle ubhedu kwabesilisa kwathi kwabesifazane kwanqoba uSelam Abere wase-Ethiopia. Isiyonke imiphumela ka-42km yeMandela Day Marathon: Kwabesilisa: 1. Tekletsion Kassahun (02:28:31) 2. Lyno Muchena (02:28:36) 3. Kebede Aberra Dinke (02:28:44) 4. Ramolefi Motsieloa (02:29:17) 5. Sikhumbuzo Seme (02:29:32) 6. Melly Kennedy (02:29:36) 7. Lutendo Mapoto (02:30:31) 8. Tsotang Maine (02:31:16). 9. Edward Mothibi (02:31:28) 10. Tarisai Rukadza (02:31:37) Kwabesifazane: 1. Mamorallo Tjoka (02:48:49) 2. Selam Abere (02:48:52) 3. Loveness Madziva (02:58:57) 4. Chelitu Bogale (03:07:17) 5. Charne Bosman (03:09:02) 6. Kidist Fisesha (03:10:41) 7. Makhosazane Ladyfair (03:12:14) 8. Samukeliso Moyo (03:14:36) 9. Melanie Van Rooyen (03:14:41) 10. Chatherina Skosana (03:18:40)