Uphumela obala ngabasha uKomphela
UMQEQESHI weKaizer Chiefs, uSteve “Mphathi” Komphela, uphumele obala wacacisa ngokudala ukuthi kubukeke sengathi uyangoqa nezinduku ezintsha leli qembu elizitheze ngenhloso yokuqinisa ukugwema izimbokodo zamazwi lo mqeqeshi azithole kubalandeli eqeda isizini yesibili eshwiba izandla.
Ngemuva kokuqeda isizini edlule iqembu lingenalutho ekhabetheni, iChiefs ingene emakethe yathenga abadlali abane kodwa kuze kube yimanje babili kuphela abasabonakele kodwa nabo futhi imizuzu embalwa ngoba befakwa sekonakele vele isikhathi esiningi.
Amakhosi asesayinise uBhongolethu Jayiya obekwiCape Town City, Dumisani Zuma (Bloemfontein Celtic), Teenage Hadebe (Chicken Inn, yaseZimbabwe) noPhilani Zulu ogcine ukubonakala ekwiMaritzburg United ngaphambi kokuthi imgqume izinyanga eziyisithupha engadlali. Kubona bonke laba badlali akekho oseke waqala umdlalo okwenza abalandeli beChiefs bavungame bekhala ngokuthi bebethengelwani kanti uma bengeke basetshenziswe.
UZulu noJayiya sebeke babonakala bengena besuka ebhentshini kodwa uHadebe noZuma abakaze babonakale nangokhalo.
Ngokusho kukaKomphela, abantu kunemibuzo abangayibuzi kodwa-ke uyayiqonda le ndaba yokuba umqeqeshi weqembu elikhulu njengeChiefs.
“Kusemqoka ukuthi abantu bakubuze ukuthi uphi uHadebe ukuze ngizophendula ngithi ulimele. Yingakho kudlala u-Eric (Mathoho) noLorenzo (Gordinho) basizwe uDaniel (Cardoso),” kusho uKomphela.
Ngokwalo mqeqeshi oneminyaka engu-50 abadlali uzobafaka kahle ngendlela ngoba akafuni ukubaxina ngomthwalo olindeleke kuwona wonke umdlali weChiefs. Uthe kwenzeka okufanayo nakuGustavo Paez oseyisithandwa manje. “Bobane laba badlali esibasayinisile bazongena khaxa futhi uma sebengenile bazochazeka abalandeli bese beqonda ukuthi kungani bebengajikijelwa emphandwini wamabhubesi (ufanisa ukudlalela iChiefs nalokhu). Ngeke ngikuxhamazelele ukubafaka ngoba abakulandelwe ngiyakwazi. Ngiyazi ukuthi akwehli kahle ukubona iqembu lakho lisayinisa kodwa liphinde liqhubeke nabadlali abebevele bekhona. Akuwona umsebenzi olula kodwa ngokushesha bazodlala bonke abadlali esibalandile futhi uma sebeqalile abaningi bazokhohlwa ukuthi besinjani ngesikhathi bengakaqali,” usho kanje uKomphela ngemuva komdlalo weChiefs neSuperSport United.
Umdlalo olandelayo weChiefs unzima njengoba izobhekana neCape Town City ekuhambeni ngoSepthemba 13. Leli qembu laseKapa eliqeqeshwa uBenni McCarthy aliyazi induku selokhu kuqale isizini ka-2017/2018.