UMKHALELE UFUNA AMAJITA ASHIYE KUKHALWA E-ENGLAND

IBAMBA lomqeqeshi weqembu lakuleli labafana abaneminyaka engaphansi kwengu-20, uHelman “Midnight Express” Mkhalele, liphonsele inselelo leli qembu elimenywe e-England lapho liyozwana khona amandla neBrazil neqembu lasekhaya.

Lo mqhudelwano ka-Under 20 uzoqala namuhla uze uphele ngoSepthemba 4. Leli qembu elihambe noMkhalele ligcine ukudlala kwiFIFA Under -20 World Cup eKorea ngoMeyi kodwa ngokuthola kukaPotshoza uyedwa kuphela umdlali obekhona kulo mqhudelwano okhona nakulo. Lo mdlali uMalebogo Modise ngokuthola kweqhawe lakho.

Umdlalo wokuqala uneBrazil namuhla ngo-8 ebusuku eSt Georges Park lapho kukhempe khona iqembu elikhulu le-England elilungisela umdlalo weMalta.

Umdlalo olandelayo kuzoba owe-England neBrazil ngoLwesihlanu eGreenhouse Meadow Stadium, eShrewbury (nawo uqala ngo-8 ebusuku).

EzikaMkhalele zizovala lo mqhudelwano wobungani ne-England ngoMsombulu eHarrison Park Stadium, eMacclesfield Road. (nawo uqala ngo-8 ebusuku). Bangu20 abadlali uMkhalele ahambe nabo kanti uzobe esizwa uDavid Notoane weMamelodi Sundowns.

“Leli yithuba elikahle kubadlali abangayazi imidlalo yomhlaba ukuthi bezwe ukuthi kunjani ukudlalela izwe lakho futhi udlala ekuhambeni. Ayikho enye indlela uma sizimisele ngokukhiqiza abadlali beBafana Bafana abangeke bashaywe uvalo kusasa uma sebebhekene namazwe omhlaba. Ngibaphonsele inselelo ngokuthi abalisebenzise leli thuba ukuthi bashiye e-England kukhalwa ngengcwenga yebhola abayidlalayo,” kusho uMkhalele.