Sebevivele oweNgqwele omaskanda
ISIHLABANI sikamaskandi Igcokama Elisha sesiphumele obala, sathi sesikulungele ukuvala umcimbi weNgqwele kaMaskandi Music Festival eWorkshop Centrum Park, eThekwini ngoMgqibelo.
Lo mculi, ozakhele udumo ngenoni lengoma ethi Malavisto nethi Xenophobia, uthe uzilolonge ngokwanele ukujabulisa izihlwele.
“Kulezi zinsuku ngiqhamuka nezinto ezimangazayo futhi ezisuke zingalindelekile. Uzokhumbula ukuthi kwiMpucuzeko Music Festival ngaqhamuka nomdlali wesigingci ogqoke i-pampers.
“Komunye umcimbi ngiqhamuke nenye insizwa egqoke isudi. KwiNgqwele ngizoqhamuka nokunye okuhlukile. Abantu bazochazeka ngempela.”
Uthe uthole isikhathi esanele sokuzilolonga njengoba ingasekho into emphazamisayo. Ezingomeni athe uzozidlala ethi iTablet, Mina NgiyaChatter Nawe Dali.
“Ngeke isale le ngoma ethi Icala Lempama ngoba abantu bayayidinga,” kuphetha Igcokama Elisha.
NoQhosha uthi naye usekulungele ukuvala umcimbi ngoba yena uthandwa yibo bonke abalandeli bakamaskandi.
“Kulo mcimbi ngifuna ukuqhulula ingoma ethi Osozimali, Yamnathela Ne Amavukane Asemaningi.”
NeMfezemnyama ithe kukhona nethi ekuhlelayo nefuna ukumangaza abantu ngakho.
“Kunengoma engiyiqophe noSjava ethi Isibhakabhaka. Ngisahlela ukuyicula naye okokuqala kulo mcimbi ngoba uthe uzobe eseThekwini. Abantu abalindele noma yini ngoba uma evuma sizoyicula naye le ngoma,” kuchaza Imfezemnyama.
Uthe ezingomeni ezingeke zisale, ubale ethi Uhlanya Lwami, Ama-Disco Light nethi Wawungenzenjani.
Ebuzwa ngokuthi usekulungele yini ukuvala umcimbi, yena uthe akakuthandi lokho ngenxa yokuthi sekuyaxatshanwa futhi indaba ize ingenwe nangabalandeli.
“Mina ngizithandela ukunandisa kusenesikhathi futhi abantu besakujabulela,” kuchaza Imfezemnyama.
Lezi zinsizwa zizobe zishiyelana inkundla nezihlabani zalo mculo okungoMroza Fakude, Amageza Amahle, Osaziwayo, Indodakazi Yentandane, Bahubhe, uMjikijelwa noKhuzani. Amathikithi asatholakala eComputicket ngo-R80.
Khona manjalo, abafundi beSolezwe abanenhlanhla bangazibeka ethubeni lokuhlabana ngamathikithi awu-20 ahamba ngamabili ngokuthumela i-sms ebhalwe ukuthi “ISOINGQWELE” ku-33258, i-SMS ibiza R1 50. Abawinile bazokwaziswa ngocingo.
Umncintiswano uzovalwa ngo-12 ebusuku, namhlanje. SICELA niziqinisekise izinombolo eziwinile ezindaweni zeLotto ezisemthethweni. ISOLEZWE ngeke likuvumele ukuthathelwa izinyathelo zomthetho uma kwenzeke iphutha.