Akumqedanga uthando ukukhubazeka
UKUKHUBAZEKA akuzange kulishabalalise uthando lomsebenzi wokuvikela, ephoyiseni lesifazane elihlonishwe ngendondo yokuba umuntu ophila nokukhubazeka ozinikele emsebenzi wakhe ngesikhathi kunomcimbi wokuhlonishwa kwamaphoyisa oPhiko lweProtection and Security Services esifundazweni, obuseThekwini izolo.
USergeant Thulisile Nchesani waseLamontville, uthe uqale kulo msebenzi ngo2002, kwathi ngo-2007 waba sengozini yemoto esemsebenzini egade osenguNgqongqoshe wezokuThuthukiswa koMphakathi KwaZulu-Natal, uNkk Weziwe Thusi wagcina esehamba ngesihlalo esinamasondo.
“Nganquma ukuthi ngeke ngiwuyeke umsebenzi ngiyohlala ekhaya. Ngaleso sikhathi bengisemncane kakhulu ngoba bengineminyaka engu-31. Uthando lwalo msebenzi luqale ngisakhula, bengikuthanda ngenhliziyo yami yonke ukuba yiphoyisa,” kusho uSergeant Ncheshani.
Uthe ngaphandle kokuthi kukhona ezinye ezinto angakwazi ukuzenza emsebenzi okudingekeka ukuthi asizwe ozakwabo kuzo, kodwa lokho akakuboni njengezingqinamba ezingehlisa uthando lomsebenzi.
“Nginengane eyodwa eneminyaka emibili, engiyithole sengilimele. Uthando lomsebenzi wami alungiphazamisi nakancane ekutheni ngikhulise ingane yami ngothando eludingayo. Njengoba sihlala nayo kwazise angikashadi, ngivuka ngiyihambise enkulisa ngaphambi kokuba ngiye emsebenzini, uma ngiphuma ngiyilande.”UMajor General Franchina Vuma oyiNhloko yalolu phiko esifundazweni, ugqugquzele amaphoyisa ukuthi aqhubeke nokwenza kahle.
“Asiqhubekeni senze umsebenzi wethu wokuthanda izwe lethu. Kungumsebenzi wethu ukuqikelela ngaso sonke isikhathi ukuthi sisebenza ngokuzikhandla ukuvikela labo okumele sibavikele. Kulabo abangazitholanga izindondo namuhla, akusho ukuthi iqhaza labo alibonakali futhi bangapheli umoya baqhubeke nokusebenza ngokuzikhandla,” kusho uMajor General Vuma. Phakathi kwemikhakha obekuklonyeliswa kuyo, bekukhona owowesifazane ovelele, owesilisa ovelele, ovelele kwezemidlalo neminye. Abanye abathole izindondo ngoSergeant Martin Mthembu.