Usobishini umfundi onikezwe u-R14m
USENKINGENI umfundi waseWalter Sisulu University, eMthatha okungene ngephutha imali engu-R14.1 million kwi-akhawunti yakhe wasebenzisa ngaphezulu kuka-R800 000 ethenga izidlo nezimpahla ezibizayo.
Umfundi kuthiwa bekumele afakelwe u-R1 400 wemali yesikhwama esixhasa abafundi, iNational Students’ Financial Aid Scheme (NSFAS) ezinyangeni ezinhlanu ezedlule kodwa kwangena lezi zigidi okuthiwa ubechoma ngazo ngisho ezinkundleni zokuxhumana.
Inkampani eyenze iphutha yafaka lezi zindodla kwiakhawunti, i-Intellimali, ithe izomthathela izinyathelo zomthetho njengoba engazange ayibikele ukuthi kungene izigidi.
Isikhulu sale nkampani, uMnuz Michael Ansell, sikhiphe isitatimende izolo ngemuva kokuba indaba yomfundi iphenduke indaba egudwini, sathi iphutha alibanga sesikhungweni noma esikhwameni esixhasa abafundi ngemali yokufunda kodwa libe kubona.
“Sibambe leli phutha ekuqaleni kwale nyanga sazisa inyuvesi kanti bese edle u-R818 000.
“Le mali yangena ngephutha ngoJuni njengoba kwakukhokhelwa abafundi abangu-3 500 bakule nyuvesi abaxhaswa yiNSFAS.
“Kuyaqala eminyakeni engu-10 ukuthi kwenzeke iphutha elinje njengoba kule minyaka sesifake kuma-akhawunti imali engaphezulu kuka-R5 billion yezincwadi nokudla kwabafundi,” kusho u-Ansell.
Uthe akekho omunye umfundi ogixabezwe ngalesi sizumbulu.
“Siyivalile i-akhawunti yomfundi ngoba siyaphenya. Sizomthathela izinyathelo zomthetho,” kusho u-Ansell. Okhulumela inyuvesi, uNksz Yonela Tukwayo, ukuqinisekisile ukuthi bayaphenya ngalesi sehlakalo. Uthe abafundi bakhalile ngempilo ebisiphilwa yilo mfundi nangendlela abesaphaza ngayo imali. “Sizophenya ukuthi umfundi ukwazi kanjani ukuthenga ezinye izimpahla ngoba kulabo esisebenzisana nabo ukwazi ukuthenga izincwadi nokudla kuphela. “Sihlanganile nomfundi THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. samazisa ukuthi kumele ayikhokhe le mali nokuthi izovalwa i-akhawunti yakhe,” kusho uNksz Tukwayo.
Okhulumela iNSFAS, uMnuz Kagisho Mamabolo, uthe babhalele inyuvesi befuna ukwazi ngaleli phutha.
“Inyuvesi kumele iphendule ngaleli phutha. Yona ithola imali kithina bese iyidlulisela kubafundi isebenzisana nenkampani. Lokhu kuyizinkomba zokuthi kumele uhlelo lwethu i-sBux lwenabele nakwezinye izikhungo ezingu-18 kuleli,” kusho uMamabolo.
Uthe lolu hlelo selukhokhele abafundi abangu-80 000 ngaphandle kwezihibe selokhu lwaqala ngo2014.