Usekubhaceni osongelwa ngokubulawa
USHIYE umuzi wayobhaca owesifazane othi uthola izinsongo zokubulawa athi zivela kumzalwane asonta naye amsize ngokumhlalisa kwakhe ngoba engenandawo yokuhlala.
UNksz Nombulelo Mokoena (41) waseNanda usethuka izanya ngenxa yemilayezo emsongela ngokufa athunyelelwa yona kwiselula yakhe evela kowesifazane asonta naye ebandleni okuthiwa umzwelile wamhlalisa kwakhe ngemva kokuthi exoshwe yisoka lakhe abekipite nalo. Uthe ubesemaze iminyaka emibili besonta ndawonye ebandleni i-New Agreement of Zion eNanda.
UNksz Mokoena ohlala nendodana yakhe ena-17, uthe uzwelo abe nalo ngesikhathi ebona lona wesifazane edabukisa engenandawo yokuhlala yilona olumdonsele amanzi ngomsele. Uveze ukuthi ubesanezinsuku emhlalise kwakhe, indaba iqale ngesikhathi emshiye endlini waya emsebenzini wabuya eseshaqe iTV yakhe enkulu, umazisi nesitifiketi sokuzalwa sengane yakhe washaya wachitha.
“Ngifonelwe umakhelwane ngisemsebenzini ngoMgqibelo kwazise bengingena ntambama, wangibuza ukuthi kukhona bani ekhaya, ebona kuvuleke umnyango kungekho neTV. Ngicelile emsebenzini ngabuyela ekhaya, ngifice kumapeketwane nasegumjini esilala kulo, umazisi wami nesitifiketio sengane yami kungekho,” kusho uNksz Mokoena.
Uthe uzame ukumfonela emcela ukuthi abuyise izinto kodwa ucingo ubengalubambi nemiyalezo ingaphendulwa. Uthe ubeze acele nabanye abantu ukuthi bafone kodwa uma kuke kwaphathwa indaba yokuthi abuyise izimphahla avele avale ucingo.
“Ngiye kovula icala esiteshini samaphoyisa eNanda, ngambhalela umyalezo ngamazisa, ngemva kwalokho bese ngithola imiyalezo engisongela ngokungibulala nendodana yami. Ngenxa yokusaba ukwenzakaliswa, sengibhace emzini kadadewethu ngoba indlela enze ngayo ikhombisa ukuthi unesibindi sokwenza umuntu kabi engakhathalele ukuthi uyamsiza,” kuchaza uNksz Mokoena.
Ngesikhathi kuthintwa lo wesifazane ucingo lwakhe beluvaliwe kwaze kwashaya isikhathi sokushicilela.
Okhulumela amaphoyisa KwaZulu-Natal uCaptain Nqobile Gwala ukuqinisekisile ukuthi likhona icala elivuliwe.
“Kuvulwe icala lokweba esiteshini samaphoyisa saseNanda, bekungakaboshwa muntu,” kusho uGwala.