Kugasele amaphoyisa kwambhedela
KUBOSHWE owesilisa (27) waseFolweni otholakale nenhlokohlela yesibhamu nezinhlamvu okusolakala ukuthi kuyathinteka emacaleni asehostela laseMlaza, iGlebelands.
Okhulumela amaphoyisa KwaZulu-Natal, uCaptain Nqobile Gwala, uthe amaphoyisa ophiko oluphenya amacala aseGlebelands agasele Ekukhanyeni Reserve, eFolweni, izolo ekuseni athola isibhamu i-R4, izinhlamvu ezingu-61 ezingakasebenzi namamagazini amathathu. Amaphoyisa afike ngemuva kophenyo obelwenziwa eGlebelands.
“Isibhamu sizohlolwa kubhekwe ukuthi asikaze yini sisetshenziswe ekubulaweni kwabantu eGlebelands noma kwenye indawo. Nomsolwa kuzobhekwa ukuthi akathinteki yini emacaleni okubulala enziwe eMlaza namaphethelo,” kusho uCaptain Gwala.
Lo mlisa kulindeleke ukuthi avele enkantolo yeMantshi eMlaza maduze.
Obambe kwesokuba nguKhomishana wamaPhoyisa KwaZulu-Natal, uMajor General Bheki Langa, uthe ukuboshwa kwalo mlisa nokutholakala kwesibhamu nezinhlamvu kubonisa ngokusobala ukuthi ithimba elijutshwe eGlebelands lizimisele ngokuvundulula izibhamu ezisetshenziselwa ukubulala abantu ehostela.
Uthe bazoqhubeka nemikhankaso efana nalena ukuqinisekisa ukuphepha kwabantu ehostela. Uqhube wathi ukuvuma kwabantu ukuthi bafakwe ohlelweni lokuvikelwa kofakazi nakho kunika ithemba ngophenyo oluqhubekayo.
Lo mlisa uboshwa nje kusanda kuboshwa amadoda amabili ngecala lokubulawa kukaNkk Sibongile Mtshali owadutshulwa eGlebelands esesitolo sakhe ngoJulayi.
OMnuz Khayelihle Mbuthuma (28) noNtobeko Gwala (31) bavele eNkantolo yeMantshi eMlaza ngoMsombuluko. Kulindeleke ukuthi bacele ibheyili ngesonto elizayo. Ngaphandle kwabo kuboshwe owesilisa otholwe nesibhamu ngemuva kokugasela kwamaphoyisa ehostela ngemuva kokubulawa komlisa (38) obeyilungu lekomiti lokuthula obulawe ngoLwesibili oludlule.