Uzoshayeka umkhandlu weTheku
UMKHANDLU weTheku uthi uzoshayeka kodwa hhayi kakhulu ngenxa yesinqumo seNkantolo yoMthethosisekelo esithi umuntu othenge umuzi akumele athwale izikweleti zomuntu asuke ethenge kuye.
Emhlanganweni wekomiti elilawula umkhandlu eCity Hall izolo, uMgcinimafa uMnuz Krish Kumar, uthe sebewutholile umbiko mayelana nesinqumo senkantolo, wengeza ngokuthi okwamanje bamatasa bayawucubungula.
“Uzoba khona umthelela okhona ngenxa yalesi sinqumo kodwa sinethemba lokuthi ngeke size sishayeke kakhulu siwuMkhandlu weTheku,” kusho uKumar.
Lesi sinqumo sikhishwe yiNkantolo yoMthethosisekelo ngoLwesibili ngemuva kokulalelwa kodaba lwezikweleti zabadayisa imizi eziwela kwabasuke beyithengile.
Lolu daba belufakwe enkantolo omasipala okukhona kubo owaseTshwane, Ekurhuleni nowaseThekwini.
NgoNovemba nyakenye iNkantolo yoMthethosisekelo yanquma ukuthi omasipala kufanele bafune imali kubantu ababakwelatayo hhayi labo abasuke bethenge imizi kodwa omasipala babenganeme ngalesi sinqumo bafaka isicelo sokuthi sichithwe.
UMkhandlu weTheku ubhekene nenkinga yokukweletwa izigidi zemali yizinkampani ezinkulu kubalwa iTransnet, Ithala Bank, Eskom, Telkom noPrasa.
Isiyonke imali ekweletwa uMasipala weTheku ngu-R74 million.
Kuphinde kwadingidwa nesikweleti senkampani yamabhasi ephethwe nguMnuz Mandla Gcaba nesenkampani iMtateni Logistics okuyinkampani usomabhizinisi waseThekwini ongasekho uMnuz Sifiso Zulu ake waba ngumqondisi kuyo.
UKumar uthe abafuni ukukhuluma kakhulu ngodaba lwesikweletu seTansnat ngoba lubucayi futhi lusenkantolo.
Ikhansela le-DA uMnuz Heinz de Boer, lithe kubaphatha kabi ukuthi uMkhandlu weTheku uyahluleka ukuqoqa imali yezikweletu ezinkampanini ezinkulu.
“Ikhona indlela yokuphoqa izinkampani ezinkulu ukuthi zikhokhe ngokuthi zinqanyulelwe ugesi namanzi. Okusiphatha kabi ukuthi umkhandlu ubanqamulela kalula abantu abahluphekayo izidingo uma bengakhokhi.”