Isikhalo ngebhilidi elihlala abahlengikazi
SEKUNESIKHALO ngebhilidi okuhlala kulo abahlengikazi basesibhedlela i-Addington osekuphele izinsuku lingenawo amanzi.
Kuthiwa leli bhilidi belingenawo amanzi kwezinye izitezi kusuka ngoLwesihlanu oludlule.
Umgqugquzeli wenyunyana yabahlengikazi, iDemocratic Nursing Organisation of South Africa (Denosa) KwaZulu-Natal, uMnuz Mandla Shabangu usole umnyango wezempilo ngokungakusukumeli ukulungiswa kwaleli bhilidi athe lisesimeni esishaqisayo.
Uthe sebekhale kaningi ngesimo abasebenzi abahleli ngaphansi kwaso yize bekhokha ukuze bahlale kuleli bhilidi.
“Isimo sebhilidi siyashaqisa. Linamawindi afile, awukho ugesi emaphaseji futhi aliphephile ukuthi abahlengikazi bangahlala kulona,” kusho uShabangu.
Uqhube wathi batshelwa ukuthi uma kukhandwa izinto kuwukumosha imali ngoba uma kukhandwa okunye kufa okunye ngoba ibhilidi selilidala.
Usole ubuholi bomnyango ngalokhu ngoba ethi abantu abasebenza kuwona ababoni phutha ekungawenzini umsebenzi wabo ngoba bayazi ukuthi abajeziswa ngokwenza izinto eziphambene nokufanele bakwenze.
“Siyakujabulela ukuthi uDkt Motsoaledi ukubonile okungahambi kahle kulomnyango nokuthi athathe isinqumo sokungenelela kodwa sethemba ukuthi ngeke kugcine lapho. Kufanele kubekhona abajezayo ngezinkinga ezikhona ukuze abantu babone ukuthi kufanele bawenze umsebenzi wabo,” kusho uShabangu.
UDkt Imran Keeka okhulumela iDA kwezeMpilo eKZN uthe sebethole izikhalo eziningi ngebhilidi okuhlala kulo abahlengikazi.
“Leli bhilidi njengelasesibhedlela i-Addington lisesimeni esingagculisi. Sengike ngathola izikhalo eziningi ngalo. Ugesi wakhona awusebenzi ngendlela, amanzi anenkinga, amapulaki kagesi awekho esimeni futhi kunengozi yomlilo,” kusho uDkt Keeka.
Uthe basanda kuthola ukuthi ukulungiswa kwesibhedlela i-Addington kuzobiza imali engaphezu kuka-R100 million naso ngeke size lilungiswe manje. Uthe lesi sibhedlela nebhilidi okuhlala kulo abahlengikazi akukona kuphela okunenkinga kulesi sifundazwe kodwa maningi amanye amabhilidi asesimeni esishaqisayo.
Okhulumela uMnyango wezeMpilo KwaZulu-Natal, uMnuz Sam Mkhwanazi uthe njengengxenye yohlelo lokulungiswa kwesibhedlela i-Addington, ikhona imali ebekiwe ukulungisa leli bhilidi elihlala abasebenzi.
Uthe amanzi asekhona esibhedlela i-Addington kanti inkinga beyidalwa ukungasebenzi kahle kwephampu ethatha amanzi emapayipini kamasipala bese iwathumela ethangini elisesitezi sika-16 esibhedlela. Uthe lukhona uhlelo olwenziwe lokuthi kuhlinzekwe amanzi ngesikhathi ipayipi lisakhandwa.