Isikhulu seSalga sizwelana namakhansela
ISIKHULU senhlangano i-South African Local Government Association (Salga), sesithethelele amakhansela ngokuthi incane iminyaka emihlanu yokuthuthukisa impilo yabantu ngoba kuthi esafunda izinto bese kumele kuyiwe okhethweni.
Efakaza kwikhomishini kaMoerane ephenya ngokubulawa kosopolitiki KwaZulu-Natal, uMnuz Lance Joel, uthe amakhansela kuwathatha iminyaka emibili nohhafu ukufunda izinto njengoba iningi lawo kusuke kungabantu abaqalayo ukuba amakhansela.
Uthe cishe u-70% wamakhansela abantu abasuke befika kulo msebenzi bengazi lutho.
Uthe bamele amakhansela angu-9 306 kuleli kanti kunabasebenzi abangu-250 000 komasipala.
UMnuz Sabelo Gwala, oyisikhulu seSalga kulesi sifundazwe, uthe uma kusetshenziswa lolu hlelo imeya iyakwazi ukuziqokela abantu bayo.
“Ohlelweni olukhona imeya ayikwazi ukuqondisa ubugwegwe abantu abakhona ngoba abaqokwanga iyona. Uma imeya iziqokela izokhetha abantu ezosebenza nabo.”
UMnuz Bhekumzi Stofile, weSalga, uthe indlela amaqembu aqoka ngayo abantu azobajuba emkhandlwini kumele ibuyekezwe.
“Kumele kube ngabantu abanamava abazojutshelwa emkhandlwini. Kunabantu abafuna ukubamba ngobhongwane inkululeko ngoba benemali ngokuthi bakhokhele abantu ukuze babaseke.” kusho uStofile.
UGwala ukuchithile ukuthi kukhona ababulalana ngoba behlupheka befuna umsebenzi wokuba amakhansela.
“Baningi abantu abahluphekayo abangabulalani ngoba befuna ukuba amakhansela. Akulona iqiniso ukuthi babulalana ngoba belambile,” kusho uGwala.
Ikhomishini iguqile kuze kube uSepthemba 18.