Kuningi okwenziwe kwezempilo
UKULWA nezifo kubalulekile njengoba isizwe esiphilile siwumgogodla entuthukeni yezomnotho.
Ngaphezu kwalokhu, izwe lakithi likuthatha njengelungelo lanoma ngubani ukuthola usizo olusezingeni lwezempilo ngaphandle kokubheka ukuthi udla izambane likampondo noma uhlwempu. Kuyaziwa ukuthi nakuba isabelomali sikahulumeni kwezempilo sinyuka minyaka yonke, kanjalo futhi kukhulu esesikwenzile ukwakhela abantu bakithi izibhedlela nemitholampilo.
Kodwa phezu kwalokhu basebaningi abantu bakithi abangalutholi usizo olufanele lwezempilo ezindaweni zasemakhaya nasemadolobheni ngenxa yokugcwala kwezikhungo zezempilo, odokotela nemishini yokusebenza okungenele. Imbangela enkulu yalokhu ukuthi imali eningi efakwa uhulumeni kwezempilo, isentshenziswa kubantu nasezikhungweni eziyingcosana zezempilo ezizimele.
Nakuba iziguli eziyisishiyagalombili kweziyishumi zisebenzisa imitholampilo nezibhedlela zikahulumeni, kodwa iningi lodokotela basebenza ezikhungweni ezizimele lapho belapha khona abantu abayingcosana. Uhlelo olumbaxambili lukaHulumeni lokukhokhela ezempilo lwehlulekile ukuqinisekisa ukuthi bonke abantu bakulelizwe bathola usizo lwezempilo olusezingeni eliphezulu ngokufanele.
Yingalezi zizathu kufanele wonke umuntu alushayele ihlombe uhlelo lukaHulumeni, i-National Health Insurance (NHI) okuhloswe ngalo ukuthi
isabelomali sezempilo sikahulumeni, sisetshenziswe ukuqinisekisa ukuthi sonke sithola usizo lwezempilo olusezingeni eliphezulu.
Kungakenzeki lokhu, umnyango Wezempilo KwaZulu-Natal sewenze lukhulu usebenza ngokuzikhandla ukulwa nezifo, ububha nokunika abantu bakithi ithemba.
Abacwaningi sebathola ukuthi zine izinhlobo zezingqinamba ezihlasele kakhulu umkhakha wezempilo kuleli. Yinhlanganisela yegciwane lesandulela-ngculazi (HIV) ne-AIDS kuhlangene nesifo sofuba; wukushona kwezinsana nomama abasuke beyoteta; izifo ezingathelelani ezibizwa ngamahlalakhona (ezifana nesifo sikashukela, esomfutho wegazi ophezulu, umdlavuza, ukuzimuka nezinye) nezingozi zomgwaqo nokulimala kwabantu ezigamekweni zodlame.
Uhulumeni waKwaZuluNatal unemikhankaso eminingi yokulwa nalezizifo nokuqwashisa umphakathi ngazo. Abasebenzi bomnyango wezempilo abagcini ngokunika abantu ulwazi ngezifo ezikhungweni zezempilo kepha lokhu sikwenza ngokuhambela zonke izinkalo kulesi sifunda sishumayela ivangeli lezempilo. Asigcini ngokunika abantu ulwazi kepha siyabahlola sibelaphe noma yikuphi lapho bekhona.
Siyafisa nokho ukuba abantu bakithi basihlangabeze ngokudlala eyabo indima ukuziphilisa nokugwema izifo njengoba siqhubeka nomsebenzi wethu wokuletha izinsiza kubona. Phakathi kwemisebenzi esizigqajayo ngayo singabala: Ukulwa ne-HIV ne-TB kanyekanye: Ngesonto eledlule uMnyango wezeMpilo kuzwelonke uqale ucwaningo olunzulu lapha KwaZulu-Natal lokuhlonza ubungako besifo sofuba ezweni lonke. Kulindeleke ukuba lolu cwaningo luholele ekuqinisweni kwamaqhinga okunqanda ukubhebhetheka kwalesi sifo, kuthuthukiswe nezinga lokwelashwa kwaso. I-HIV nesifo sofuba kufana namawele, kanti isifo sofuba yiso esibulala abantu abane-HIV kakhulu kunezinye. Yingakho sekufakwe imishini ebizwa nge-GeneXpert ewu-90 ezibhedlela, nekwazi ukusheshe iveze imiphumela ye-TB ne-Multi-Drug Resistant TB esikhathini esiphakathi kwamahora wu-24 kuya kwangu-48. Abantu abasalindi isikhathi eside ukuthola imiphumela njengakuqala.
Ukusatshalaliswa kwemithi eduze nasekhaya:
Ngaphansi kwalolu hlelo, olubizwa ngeCentral Chronic Medication Dispensing and Distribution (CCMDD), bangaphezu kuka 770 000 abantu balapha KwaZulu-Natali asebeyithola eduze nasekhaya imithi yezifo ezifana nesikashukela; esomfutho ophezulu; esenhliziyo; umdlavuza neyokuthithibalisa igciwane lesandulela-ngculazi. Itholakala emahholo omphakathi, ezitolo, ezikoleni, ezinkulisa, ezizindeni ze-Operation Sukuma Sakhe (War Rooms), ezindlini zokukhonza, nasezinkantolo zamakhosi, ukubala nje izindawo ezimbalwa. Bonke abantu abaseduze nemitholampilo babhekelelwa ngokuthi bangalindi emigqeni emide, kodwa bavele baqonde emawindini akhipha imithi bafice amaphasela emithi yabo esebalindile.
Lolu hlelo luhle futhi ngenxa yokuthi yonke imithi ezolandwa ifakwa ezikhwameni ezingamapheshana afanayo. Lokhu kugwema ukukhishwa inyumbazana kwabantu ngenxa yezifo abanazo, nokuyinto esenzeka futhi eyishwa.
Ukuhlinzekwa kwabanegciwane lengculazi ngaphandle kokuthi balinde (Universal Test and Treat):
Kusukela ngoSepthemba 1, wonke umuntu ohlolwa kutholwe ukuthi unegciwane lengculazi usenikwa imishanguzo (emva kokwelulekwa), ngaphandle kokulinda kuze kwehle i-CD4 Count njengakuqala. Lokhu kusiza ngoba igciwane linqandwa lingakasabalali emzimbeni womuntu.
Uhlelo lokusokwa kwabesilisa okuphephile, i-Medical Male Circumcision:
Kusukela ngonyaka ka-2010, isifundazwe saKwaZulu-Natal sesisoke amadoda nabafana abangaphezulu kuka 780 000 selokhu iSilo samaBandla uKing Goodwill Zwelithini sahlaba ikhwelo lokuthi kuvuselelwe isiko lokusoka.
Selokhu lwaqala loluhlelo, akukaze kubikwe sigameko sokushona kwabantu ngenxa yalo. Loluhlelo lubandakanya ukufundisa abesilisa ngendlela yokuziphatha empilweni. Siyafisa ukukugcizelela ukuthi ukusoka akumniki umuntu igunya lokuthi aye ocansini angayisebenzisi ikhondomu, ngoba kuwanciphisa ngo 60% kuphela amathuba okuthola isandulela ngculazi.
Ukwehla kakhulu kwesibalo sabantwana abasulekeka ngegciwane lengculazi ngesikhathi bezalwa (Prevention of Mother to Child Transmission of HIV):
Siyaziqhenya ngokwehla kwesibalo sabantwana abasuleleka ngegciwane le-HIV ngesikhathi bezalwa njengoba sesize sacishe safika lapho siphela khona njengoba simi ku-1,2%. Sisuka kude nokho. Empeleni ngo2009/2010 lesi sibalo besiwu-9,5%. Lapha sibonga bonke abezempilo abaqinisekise ukuthi bonke abakhulelwe bayohlolelwa igciwane le-HIV. Sifisa ukugcizelela ukubaluleka kokuyoxukuza emtholampilo kubo bonke abazithwele. Lokhu kusiza ngokuthi uma kunezinkinga ezithile zisheshe zitholakale, bese kusizakala umama nomntwana.
Siyakugqugquzela nokuvakashela emtholampilo noma kanye ngonyaka, uyoxilongwa nje, ngisho uzizwa ungaguli. Okuthokozisayo ukuthi nalapho singakafinyeleli khona ukwakha imitholampilo, izisebenzi zezempilo ziyafinyelela nemitholampilo engomahamba nendlwana.
UDkt Dhlomo uwuNgqongqoshe wezeMpilo KwaZulu-Natali