U-DJ Kotyin usesungule ibhizisinisi lokudla eThekwini
UKUNGAKHOKHELWA ngesikhathi ngabahleli bemicimbi sekwenze ukuthi uDJ Kotin asungule ibhizinisi, ngethemba lokuthi lizomngenisela imali njalo.
UDJ Kotin wodumo lwengoma ethi Ngincamela Wena ayepike kuyo uSamke, avule indawo yakhe yokudlela kuBroad Street (Dr Yusuf Dadoo) ngaseThokoza enkabeni yeTheku, eqale ukusebenza ngo-Agasti 28.
Uthe ukubone kubalulekile ukuthi aqale ibhizinisi lokudla ngoba kunesidingo ngalapho elivule khona.
“Kuyenzeka ukhokhelwe sekudlule isikhathi mhlawumbe ngezinyanga ezintathu. Usuke unayo imali kodwa ingekho kuwe. Esitolo kungcono ngoba imali ingena njalo, umuntu akakwazi ukudla akhokhe ngelinye ilanga,” kusho uKotin.
Uthe: “Iqiniso wukuthi ngeke uphile ngomculo impilo yakho yonke. Awubi matasa ngomculo izinsuku eziyisikhombisa ngesonto ngoba akuzona zonke izinsuku oqashwe ngazo, osestudiyo ngazo noma oya ngazo emsakazweni. Isikhathi sami ngithe ngizosichitha ebhizinisini.”
Uthe indawo yakhe uyiqambe ngegama likanina lesibili.
“Indawo engikuyo inezindawo ezine ezihlala izingane zesikole eduze. Ngidayisa ukudla kwesintu njengenhloko nobhatata, sibe no-curry kanjalo namagwinya,” kusho uKotin.
Leli yibhizinisi lakhe lesibili njengoba enenkampani ehlela imicimbi, iKotin Communication & Events. Le nkampani isanda kuhlela i-Ekasi July Experience e-Artizen Lounge ngempelasonto yeDurban July.
Ukungena kwakhe egamanxe ebhizinisini uthe akusho ukuthi uzohoxa emculweni. Ngonyaka odlule ukhiphe ingoma ethi Uzongilinda.
“Kulo nyaka ngizokhipha ingoma ethi Ngixolele engiyenze noNina ongumculi we-jazz osafufusa. Ngifuna ukuzinikeza isikhathi esanele sokuthi ngakhe igama lami futhi abantu kube yibo abacela i-albhamu. Iphutha elenziwa ngabaculi abaningi wukuthi bakhipha amaalbhamu agcine ehleli emashalofini ngoba abantu abawathengi ngoba ababazi,” kuchaza uKotin.