IFree State Stars icuthele umdlali ochithwe yiBucs
IFREE State Stars icuthele umdlali ochithwe yi-Orlando Pirates uPatrick Phungwayo oyibamba ngakwesokunxele emuva.
Lezi zindaba ziqinisekiswe ngumqeqeshi weqembu uLuc Eymael ngesikhathi exoxa naleli phephandaba izolo. “Sithungatha umdlali odlala ngakwesokunxele emuva noyibamba phakathi nenkundla emuva. Sihlola uChesylin Champies oyibamba ngakwesokunxele emuva. Sizobona ukuthi sithatha bani phakathi kwakhe noPhungwayo. Akazange afonelwe yimina kodwa iqembu lixhumanile naye uPhungwayo. Ungumdlali oseqophelweni eliphezulu.”
Lo mqeqeshi uthathe indawo kaSammy Throughton kwiFree State. “Usungabhala ukuthi sisayinise uBangaly Keita waseGuinea. Ngimfice lapha eqenjini ezama inhlanhla. Ngiyamazi kwazise ngisebenzile naye eMorocco. Ungumdlali oseqophelweni eliphezulu futhi angingabazi ukuthi uzofike enze kahle.”
Ngaphambi kokuthi ajoyine iFree State uke wamtaniswa neqembu lesizwe lase-Uganda. “Yebo iqembu lesizwe lase-Uganda like langithinta. Baxhumane nemenenja yami. Kwakuhlelwe ukuthi sizohlangana nomengameli wasoseshini wabo. Nokho lokho kugcine kungenzekanga. Ngagcina ukukhuluma nabo ngo-Agasti 8. Elinye iqembu ebelingifuna yiZesco United yaseZambia. ESudan bengifunwa yi-Al Hilal. Bona bangazela kwi-Al-Merrikh SC engike ngayithatha ngayibeka kuma-semi final kwiCAF Champions League,” kusho u-Eymael.
IZesco United izodudulana neSuperSport United kwiquarterfinal yeCAF Confederation Cup ekhaya nasekuhambeni.
“Lapha kwiFree State awukho umbandela engibekelwe wona. Ngizifakele mina ingcindezi ngokuthi ngithi ngifuna ukuqeda kwiTop 8. Yisona isifiso sami esikhulu leso. Okungijabulisayo wukuthi iqembu liyayithakasela indlela engifuna lenze ngayo izinto. Isimo sabo siphansi kakhulu. Baku-65% njengamanje, angifuni ukubajaha ngoba bangaze balimale,” kusho u-Aymael.
IFree State ihlola u-Edward Manqele ochithwe yiKaizer Chiefs.
“UManqele ngiyezwa kuthiwa ubezimukile kodwa usethe ukwehla kancane. Ejimini ukhombisa izimpawu zokuba ngumdlali okahle. Ngisafuna ukumbona emidlalweni. Ngempelasonto sinomqhudelwano esizobe sidlala kuwona. Ngemuva kwalokho ngizobe sengithatha isinqumo sokuthi ngiyamthatha noma cha,” kuphetha u-Eymael.