Sitholwe nguGibson ebesigaqelwe wuToyana
UKHALE ngaphansi umqeqeshi weHighveld Lions uGeoffrey Toyana esikhundleni somqeqeshi wamaProteas.
Izolo iCricket South Africa (CSA) iqinisekise u-Ottis Gibson, obecija abashwibi be-England, njengomqeqeshi omusha wamaProteas. UToyana wasifaka isicelo sokucija amaProteas futhi wabizwa kwinhlokokhono. Lo mqeqeshi usezakhele igama ngokunqoba izicoco aphinde akhiqize abadlali abaphelela eqenjini lesizwe amaProteas.
Phakathi kwabadlali asebakhiqizile singabala uKagiso Rabada, Quinton de Kock, Chris Morris, Temba Bavuma, Aaron Phangiso no-Eddie Leie bonke abaphelele eqenjini lesizwe. ENingizimu Afrika asikho isicoco angakaze asinqobe.
UGibson (48) uzoqala ukucija amaProteas phakathi nenyanga ezayo uma elakuleli selibhekene neBangladesh ochungechungeni lwemidlalo emibili yama-Test, emithathu yosuku olulodwa nemibili yeT20.
Inkontileka yakhe izophela ngemuva kweNdebe yoMhlaba ngo-2019. URussell Domingo obecija amaProteas usezocija iqembu leSouth Africa A okuyiqembu eliphakela elesizwe (amaProteas).
UShukri Conrad obecija iqembu leSA A usezoba ngumqeqeshi wePowerade National Academy. UGibson wayengumdlali weqembu lesizwe laseWest Indies. Wadlala imidlalo emibili ye-Test nengu-15 yosuku olulodwa. UGibson uke wadlala eNingizimu Afrika kwiBorder naseGauteng.
Uzothwala kanzima ethatha izinqumo ngabadlali njengoba kubuya izingwazi zamaProteas u-AB de Villiers noDale Steyn. UDale ubelimele, okuphoqe ukuthi ahlale izinyanga eziyisishiyagalolunye engadlali. UDe Villiers ubesacele ukuhlaba ikhefu emidlalweni yama-Test ngoba umkakhe ebesanda kubeletha. Bobabili laba badlali yibona asebedlale isikhathi eside kumaProteas. USteyn (34) nguyena onamawikhethi amaningi emidlalweni yama-Test kubadlali abasayibambile kwelesizwe. Usethathe amawikhethi angu-417. Udinga amane ukuze aphathe irekhodi likaShaun Pollock owathatha angu-421.
USteyn usedlale imidlalo engu-85 kwelesizwe. UDe Villiers (33) ubalwa nabadlali asebeshaye ama-run amaningi esikwatini samanje kumaProteas. Usehlomule ngawu-8074 emidlalweni engu-106 yamaTest.
Elakuleli lisanda kuthelwa othulini yi-England ngo 3-1 ochungechungeni lwemidlalo yama-Test. AmaProteas abukeke eyinhlakanhlaka ikakhulukazi kuma-batsman. Lokhu kuphoqe ukuthi asebenzise izindlela eziningi ezingazange zisize. Kowokuqala amaProteas asebenzisa ama-batsman ayisikhombisa, yi-all rounder eyodwa, i-spin esisodwa