Izophela eMabhida Stadium iComrades
KUZOQOPHEKA umlando ngeComrades Marathon ka-2018 ezophothulwa eMoses Mabhida Stadium ngokokuqala ngqa emlandweni walo mjaho.
Lokho kumenyezelwe ngabahleli bomjaho izolo eMonte Casino, eGoli, izolo, kade kwethulwa iComrades ka-2018 ngokusemthethweni.
Umqondisi womjaho uRowyn James, uthe bese kuyisikhathi eside befuna ukuba lo mjaho uphothulwe eMabhida.
“Kuyintokozo kithina ukuba sikwazi ukuphothula lo mjaho kule nkundla enomlando omkhulu njengoba yasetshenziswa ngeNdebe yoMhlaba ka-2010. Umjaho wethu nawo uhlonishwa umhlaba wonke ngakho impela sizoqopha umlando ngo-2018,” kusho uJames.
Lo mjaho eminyakeni edlule ubusongwa eSahara Cricket Stadium, eThekwini.
Ukuphothulwa kwawo eMabhida kuzoba nomthelela njengoba ibanga lawo kwehliwa lizoba u-89.2km.
Okwamanje abakaqinisekisi ukuthi uzohamba kumuphi umgwaqo uqonde eMabhida. UJames uthe usazohlangana nomasipala waseThekwini nabaklama umgudu womgwaqo ukuze baqinisekise ukuthi konke kuhleleka ngendlela.
Lokhu kukhombise ukungabaxaki abasubathi abebehambele ukwethulwa komjaho njengoba bekwamukele ngenhlokomo ukuphothulwa kwawo eMabhida.
UBongmusa Mthembu umpetha wakulo nyaka uthe bathokoze kakhulu ngalesi sinqumo sabahleli.
“Kade sasikufisa ukuphothula umjaho wethu enkundleni ehlonishwa njengeMabhida,” kusho uMthembu.
Lo msubathi oneminyaka engu11 egijima iComrades uthe ngeke akuqinisekisa ukuthi ngo-2018 uzosivikela isicoco sakhe, kodwa uzogijima njengaminyaka yonke. Uzibekele iminyaka emihlanu noma eyisithupha egijima kwiComrades.
Ngonyaka ozayo umsubathi ozodla umhlanganiso uzodla R440 000, kuthi ozophula irekhodi lokwehla agixabezwe omunye u-R440 000. Icela ku-R4 million isiyonke imiklomelo ngokwehlukana kwayo.
Kuphinde kwamenyezelwa ukuthi abasubathi bakwamanye amazwe ase-Afrika bazongenela lo mjaho ngemali efanayo neyabasubathi baseNingizimu Afrika obekungenzeki phambilini.
Okunye okuzojabulisa abasubathi yimoto yakwaToyota, iCorolla, ezowinwa yinoma yimuphi umsubathi okuzotonyulwa igama lakhe esigqokweni sekuphele umjaho.
Kuvulwa ngoLwesihlanu ukungenela umjaho. Uzoba ngoJune 10 ngonyaka ozayo, usuka eCity Hall eMgungundlovu. Usihlalo womjaho uSfiso Nzuza umemezele isiqubulo somjaho ka-2018 esithi: Asijiki.