OweBig NUZ usezenzela okwakhe
ILUNGU leBig NUZ, uDanger, lithi ngeke lihlale lilinde uzakwabo uMampintsha lingenzi lutho.
UDanger usesungule inkampani yakhe, i-108 Entertainment ahlose ngayo ukufukula abanye abaculi.
UDanger ukusho lokhu ngemuva kokubuzwa yiSolezwe kwazise uMampintsha ukhiphe umculo omusha enkampanini yakhe, iWest Ink Records.
Nangonyaka odlule ubematasa nomculi wasenkampanini yakhe uBabes Wodumo apikwe kuzo zonke izingoma zakhe.
Nonyaka iBig NUZ ikhiphe ingoma entsha ethi Sibongile kanti kubonakala uMampintsha engazinikele kuyo kakhulu njengoba esekhiphe izingoma ezintsha neWest Ink.
“Isinesikhathi ikhona (i-108 Entertainment) kodwa bengingagxilile kuyo. Isikhathi siyahamba kumele nami ngenze okunye ngingalindi uMampintsha,” kusho uDanger.
Uthe sebekhona abaculi abasenkampanini yakhe kodwa ngeke abadalule okwamanje ngoba ufihle induku emqubeni.
“Abantu bazobona uma sesibadedela. NgoDisemba ukhona umculo abantu abazowuzwa.” Uthe kukhona okunye akwenzayo eceleni aziphilisa ngakho ngaphandle komculo.
“Kukhona engiziphilisa ngakho kodwa ngeke ngande kakhulu. Ngeke ngithembele kakhulu emculweni. Kubalulekile njengomculi ukuthi ukhule. Akukhona ukuthi sibulala iBig NUZ, nayo iwumsebenzi wethu ngeke siyibulele. Sibadala ngakho kumele senze okunye eceleni,” kuchaza uDanger.
Uqhube wathi akuphelile ngeBig NUZ njengoba inayo ingoma futhi inezindawo eqashwe kuzo. NgoMgqibelo uthe bazobe benandisa Eyadini Lounge, eMlaza nakwiDubane Spring Break eShaka Marine World.
“Anginaso isiqiniseko sokuthi i-albhamu ephelele izophuma nini. UMampintsha umatasa, nami ngiyahlanganisa. Uma isikhathi sesifanele, sizokhipha.”
Uthe kunezingoma apikwe kuzo abantu abazomuzwa kuzo okubalwa ekaDJ Mngadi ethi Ivolovolo akade beyiqophela i-video, eka-Abdul Khoza odlala indawo kaQaphela kwiSibaya neyamaDando abapikwe kuyo no-Okmalumekoolkat.