Akucaci ngomsebenzi kaCriselda
AKUCACI ukuthi uzobuyela nini emsebenzini umsakazi weMetro FM, uCriselda Dudumashe, okhishwe emoyeni ngasekupheleni kwenyanga edlule.
UCriselda ushayela uhlelo iMetro FM Talk ngo-7.30 ebusuku ngoLwesithathu nangoLwesine.
UCriselda ngesikhathi ethintwa izolo ekuseni ebuzwa ukuthi ubuyela nini emoyeni uthe: “Mhlawumbe kungcono ubuze kubaba u(Kaizer) Kganyago.”
Kganyago uthe, “Azikho ezintsha (izindaba) ngokumiswa kwakhe.”
Kulezi zinsuku uhlelo lubanjwe nguKgopedi Lilokoe.
UCriselda wakhishwa ngemuva kokuthi kube nokukhulu ukukhala ngaye ezinkundleni zokuxhumana ngokuvikela kwakhe obeyiPhini likaNgqongqoshe weMfundo ePhakeme, uMduduzi Manana, osolwa ngokushaya abesifazane eCubana, eFourways.
Usolwa nangokucwasa abantu abazishintsha ubulili (transgender) ngesikhathi ekhuluma e-University of Venda muva nje. Kuthiwa wacela abesilisa ukuthi basukume wathi uma nje besenezinduku, bangamadoda. Waxolisa ngalokhu.
UKganyago wathi iSABC iyizwile imibono yakhe okuthiwa yakhishwa nguye kwezokuxhumana futhi iyaziqhelelanisa nakho.
Umhlaziyi wokusebenza kwezinkundla zokuxhumana eNingizimu Afrika, u-Arthur Goldstuck, weWorld Wide Worx unikeze abantu iqhinga lokuthokozela izinkundla zokuxhumana ngaphandle kokungena enkingeni.
“Uma usebenzisa izinkundla zokuxhumana, kuthathe ngokuthi uphambi kwabantu abahlanganisa ozakwenu emsebenzini, abaphathi bakho, abazali bakho, amalungu omphakathi nezingane zakho. Into oyishoyo ungayisho yini phambi kwalabo bantu. Uma impendulo ithi cha, ungakubhali ofuna ukukusho,” kusho u-Arthur.