Kuboshwe umyeni kanesi owabulawa
KUBOSHWE umyeni wowesifazane waseSnathingi, eMgungundlovu, owabulawa ezoshada ngakusasa.
UMnuz Jabulani Sithole (44) uvele eNkantolo yeMantshi eMgungundlovu ngoLwesihlanu ebhekene necala lokubulala uNksz Nompumelelo Ngubane (37).
UNksz Ngubane obengunesi esibhedlela i-Edendale watholwa ebulewe emotweni yakhe kwaPata ngo-Agasti 18 nonyaka.
Amaphoyisa esifazane okuthiwa yiwo abephenya leli cala abophe umsolwa ezihlalele kwakhe ngoAgasti 31 nonyaka.
Umsolwa okuthiwa uhlanza ibhilidi lesibhedlela iGreys eMgungundlovu uboshwe nabanye ababili.
Okhulumela amaphoyisa KwaZulu-Natal, uLt Colonel Thulani Zwane, ukuqinisekisile ukuthi umyeni kamufi bambophile futhi uphenyo luyaqhubeka.
“Kuboshwe abantu abathathu abaneminyaka ephakathi kuka17 no-44. Uphenyo luyaqhubeka necala lisenkantolo,” kusho uZwane.
Umsolwa uboshwe nomfundi oneminyaka engu-17 ongeke adalulwe noMnuz Kwanele Shoba (21).
Laba ababili kuthiwa bathengwa nguSithole ukuba baklinye umakoti wakhe ayezoshada naye ngakusasa eGolden Horse Casino khona eMgungundlovu. Ngokusho kukadadewabo kamufi, uNksz Nondumiso Ngubane, lo nesi wahamba ekhaya eyokwenza ikhanda edolobheni, akabange esabuya ekhaya. Isolezwe lithole ngomthombo osondelene nophenyo ukuthi umyeni walo wesifazane ukhale ngokuthi ubengeke esakwazi ukuqhubeka aqambe amanga kulo wesifazane ngoba ubengenazo izinhloso zokuba bashade kodwa ubefuna imali yakhe kuphela.
“Kwesinye zezinto ezivelile ngukuthi umsolwa kukhona nemali ayeyidlile yomshado,” kusho umthombo.
Omakhelwane bakwaNgubane batshele Isolezwe ukuthi bebengakulindele ukuba kuboshwe umyeni kamufi.
Umakhelwane ongathandanga ukudalulwa uthe namanje basashaqekile ngokuboshwa kwakhe.
“Akekho umuntu ongacabanga ukuthi umakoti ubulewe ngumyeni wakhe bezoshada naye ngakusasa. Namanje sizibuza okuningi, izimpendulo azikho. Sifisa inkantolo yenze umsebenzi wayo ukuze iqiniso lizovela,” kusho umakhelwane.
Imizamo yokuthola udadewabo kamufi uNksz Nondumiso Ngubane ukuze aphawule ngokuboshwa komyeni kadadewabo izolo ayiphumelelanga ifoni yakhe ibikhala ingabanjwa.
Phambilini uNksz Ngubane wathi ngeke baphawule kakhulu ngosibali wakhe okuthiwa ubeshadelwe ngomunye umuntu.
Umufi nomsolwa kwavela ukuthi banezingane ezimbili. Umsolwa kwavela ukuthi ubenomunye unkosikazi abesebenza naye esibhedlela iGreys. Umndeni kaNgubane waveza ukuthi wona ubungenalo ulwazi ngalokho, wawuzitshela ukuthi umufi uzoshada nomyeni wakhe kwaphela nje.
Abasolwa kuleli cala kulindeleke ukuba babuyele eNkantolo yaseMgungundlovu maduze.