Bezihlale zishiywa zodwa izingane
UBEJWAYELE ukushiya izingane zodwa ahambe ayoziphuzela unina wezingane ezine ezitholwe zigwaziwe zacwiywa izindlebe zangakwesokunxele, KwaNzimakwe, eNcukeni ngasePort Edward, ngempelasonto.
Ngesikhathi Isolezwe livakashele kwaMbhele izolo, uNksz Slindile Mbhele (29) ongunina wezingane uthe ngesikhathi efika ekuseni ephuma endaweni yokucima ukoma usizwe amaphoyisa amthathe amvalela evenini umphakathi usho ukumqeda ngesibhaxu.
Uthe ujwayele ukuthi njalo ngezimpelasonto angabuyi kodwa uye atshele izingane ukuthi azilale kwamakhelwane, uma engeke abuye.
“Ngilandwe wumngani wami ngisethaveni wathi angiphuthume ekhaya kukhona okwenzekile. Ngesikhathi ngifika ekhaya bekuyihora lesishiyagalombili ekuseni, ngakhonjiswa isidumbu sendodana yami uLwandile ebesilele ngasengadini. Amalungu omphakathi angishayile engisola ngobudedengu bokushiya izingane zodwa,” kusho uNksz Mbhele.
Uthe ngoLwesihlanu, ngaphambi kokuba ahambe, uqale wayozithengela ukudla edolobheni ePort Edward ngemali yazo yesibonelelo sikahulumeni.
Kulesi sehlakalo kubulawe izelamani zakwaMbhele uBandile (12) obefunda uGrade 7, Lwandile (10) obefunda uGrade 6, S’phindile (8) obefunda uGrade 4 KwaNzimakwe Primary noLwandle (4) okuthiwa bese ebhalisele uGrade R kulesi sikole ngonyaka ozayo. Izidumbu zabathathu zitholwe zilaliswe embhedeni begwaziwe bacwiywa nezindlebe zangakwesokunxele kwathi esikaLwandile satholwa engadini sinamanxeba okugwazwa.
UNkk Victoria Mkhoma ongumakhelwane oseduze nalo muzi uthe uLwandile ufikile ebusuku emzini wakhe wathi kunomalume obadlalisa ngokubabopha izandla.
“Ingane ikhulume nendodakazi yami ngoba mina bengizivalele ekamelweni lami ngoba uma sekuhwalele ngiyavala endlini lapho ngihlala khona. Indodakazi yami itshele ingane ukuthi ayihambe iyolanda izingubo zokulala nezingane zakwabo ngoba vele bajwayele ukulala lapha ekhaya ngoba unina uhlala engekho ngezimpelasonto. Ingane iphinde yabuya yazosho ukuthi uninalume u... (imusho ngegama) usebaqaqile, yabuyela emuva,” kusho uNkk Mkhoma.
Uthe uthuke woma ngesikhathi ezwa indodakazi yakhe isiqhumisa isililo ngesikhathi eyithume ukuthi imcelele ingane ukuthi imphelezele aye kwamfowabo ngoba usekhulile.
KwaMbhele amalungu omphakathi abematasatasa elungisa kukhona nogandaganda obulungisa umgwaqo ongenela khona.
UNkk Nomusa Mqwebu oyiMeya kaMasipala iRay Nkonyeni uthe umasipala uzolekelela emalungiselelweni okufihlwa kwezingane.
Ufike negilosa ngesikhathi ezobhonga emswaneni.
“Le nto isishaqise kakhulu, asazi ukuthi kungeneni ebantwini. Sesihlala sizwa ngezinto ezibuhlungu nezishaqisayo ezindabeni,” kusho uNkk Mqwebu.
Uthishomkhulu waKwaNzimakwe Primary, uMnuz Bonginkosi Venda, uthe bashaqekile ngokwenzekile nezingane zithukile ngemuva kokuzwa okwenzekile kodwa sezamukelile.
“Nathi besisazoya kwaMbhele nesigungu esilawula isikole. Kwenzeka lokhu nje bekukade kunomkhankaso ngoMeyi esikoleni lapho amaphoyisa enike khona zonke izingane izimpempe ukuze zizishaye uma kukhona okuzehlelayo,” kusho uVenda.
Amanye amalungu omphakathi akhulume neSolezwe agxeke unina wezingane ngokuba budedengu.
Okhulumela amaphoyisa KwaZulu-Natal, uCaptain Nqobile Gwala, uthe bekungakaboshwa muntu kanti owesilisa otholwe elele endlini uphonswe imibuzo wadedelwa.