Uncamele ukufa umfundi oyekiswe u-matric emuva kokugula
UMNDENI womfundi ka-matric ozibulele usola ubuhlungu bokuyekiswa ukufunda ngoba kuthiwa akabuyele ngonyaka ozayo esikoleni.
UScelo Cedric Madlala (18), waseKlaarwater obefunda e-Overport Secondary eThekwini, ubengcwatshwa ngoMgqibelo emuva kokuzilengisa kubo. Kuthiwa abazali bakhe bathole ngenyanga edlule ukuthi ubengasavunyelwa ukungena ekilasini ngenxa yokuthi waphuthwa yizifundo egula.
Unina, uNkk Thobile Madlala uthe ibuhlungu inhliziyo yakhe ngendlela ezibulele ngayo indodana yakhe. Uthe umufi wagula ngethemu yokuqala, waquleka esikoleni wabuyiswa.
“Samyisa esibhedlela walala isonto wabuye wahlala inyanga ekhaya engakalulami kahle. Odokotela bathi ababoni lutho ngaphandle kokuthi umqondo uyaphambana. Esephuma esibhedlela samyisa kubantu besintu bamelapha, wangcono,” echaza.
UNkk Madlala uthe esikoleni bebazi ngokugula kwengane ngoba yaquleka khona esikoleni. Uveze ukuthi ngethemu yesibili ingane yamtshela ukuthi kuthiwa kumele iqale kahle ngonyaka ozayo esikoleni ngoba isisale kakhulu ezifundweni.
“UScelo ayimphathanga kahle le ndaba ngoba wayezimisele ngokuthi aqede kulo nyaka esikoleni. Ngethemu yokuqala wafeyila isifundo esisodwa. Uqhubekile nokuya esikoleni ngaze ngezwa ngezingane ukuthi akasavunyelwa ukungena emakilasini. Bengimshiya egqokela ukuya esikoleni mina sengiyodayisa ekuseni,” kusho uNkk Madlala.
Utshele Isolezwe ukuthi uze waya esikoleni ngoAgasti 15 eyozwa ngodaba lwendodana yakhe. Othisha bamtshele ukuthi kade kwathunyelwa incwadi yokuthi umufi afike nomzali ngoba ubesedlulwe yizifundo. Uthe bamtshele ukuthi ngenxa yokusilela kakhulu kukamufi sekumele abuyele ngonyaka ozayo esikoleni. Kuthiwa umfundi wagcina ngalolo suku esikoleni kodwa elokhu ebalisa ngalolu daba. “Wafike ekhaya wangitshela ukuthi uncamela ukufa kunokuyeka isikole. Anginakanga ukuthi usho ukuthi uzozibulala ngoba ngaze ngameluleka ngokuthi abekezele. Nakubangani bakhe kuthiwa ubelokhu ebalisa efuna ukubuyela esikoleni.” Isidumbu sikaScelo satholakala silenga ekhishini lakubo ngo-Agasti 21. Kuthiwa ekuseni wathi izingane zakubo azisheshe zihambe ziye esikoleni, wasala yedwa. Izingane zakubo ezineminyaka eyisishiyagalombili neshumi, zamthola elenga zibuya esikoleni.
Okhulumela uMnyango wezeMfundo KwaZulu-Natal uMnuz Sihle Mlotshwa, uthe bayazwelana nomndeni womfundi. Uthe bazocela umbiko ophelele esikoleni ukuze bathole ukuthi udaba lukamufi lusingathwe ngokufanele yini.
UColonel Thembeka Mbhele okhulumela amaphoyisa esifundazweni uthe kuvulwe idokodo ngokuzibulala komfundi.